【盤房來料】小米美團短炒連環中奬
隔晚美股個別發展，納指再創新高，但道指升幅收窄，標指更倒跌收場，暫時無乜大方向，都係受疫苗消息及新一輪刺激經濟方案消息影響。不過美國正式將中芯國際(00981)及中海油(00883)母企列入黑名單，指兩間公司屬於由解放軍擁有或控制嘅企業。不過呢個消息傳咗幾日，市場都消化得七七八八。只係市場擔心中美關係再陷入僵局，令投資者入市態度更趨審慎，拖累港股今早偏軟，不過恒指波幅偏窄，高低位只有161點。
恒指高開83點報26811，升幅一度擴大至85點，高見26813，但之後又見沽壓，大市升勢不保，倒跌76點，但10曰線(26631)見支持，大市跌幅收窄。最終半日恒指收報26686點，跌41點；國企指數跌5點，報10580；恒生科技指數升31點，收7971。咪睇今日半日得655億元成交額，全日收市成交額將會大增，因為今日係被動指數基金要就恒指服務公司更新公司旗下不同指數變動，而作出組合調動，所有買賣盤都要喺今日競價時段完結前完成，所以全日成交定必大增。
藍籌股普遍受壓，友邦(01299)跟大笨象(00005)由尋日支撐大市變成拖累大市，前者半日跌1.2%，後者先升後回，半日跌0.8%。其他中資金融股全部低走，不過沽壓唔算嚴重，跌幅均受控於1%之內，當中一直最強勢嘅平保(02318)半日則維持0.7%升幅。中海油(00883)跌勢未止，半日再跌2.2%，而午後復牌嘅中芯國際(00981)，阿Man提醒唔好多手接飛刀博反彈，母企被美國點名唔使旨意有運行，貪平永遠無好結果，記住貪字永遠得個貧。而之前阿Man喺其他平台推介過嘅蒙牛(02319)則成為半日升幅最大藍籌，半日升2.7%。
雖然人民幣持續強勢，但內房股呢排未見有起色，可能早有春江鴨知道阿爺將堅定不移落實房地產長效機制，謀劃好「十四五」時期住房工作，加強住房保障體系建設，有效擴大保障性租賃住房供給，呢啲正正係國務院副總理韓正上日喺住建部召開座談會嘅發言。內房股沽壓大，世茂(00813)插9.3%，為表現最差國指成分股；融創(01918)挫3.9%；萬科(02202)挫3.5%；碧桂園(02007)降3%；奧園(03883)跌2.9%；中海外(00688)跌1%；潤地(01109)跌2.3%；恒大(03333)跌1.1%。
科技股大致做好，未有跟隔晚美股科技巨企走軟，JTAMX全線做好，尋日阿Man指用十蚊雞止蝕博美團(03690)染藍後做好，今日有晒交代，半日升4.8%，短炒有可以即食。連同前日阿Man呼籲趁小米(01810)批股後復牌執平貨，兩日嘅即市策略都有唔錯收穫。
移卡(09923)宣布配股集資，中午股價跌逾8%，阿Man早早講過移卡並唔係乜嘢好貨式，股價高見80元大插穿埋50元收市嗰日起，移卡已玩完，硬係唔明仲有缸邊友對此股念念不忘唔死心，今次配股集資後，股價再受壓係意料中事。其實買乜嘢股都好，高追與否並唔係問題，最緊要係買貨時有先訂好入市策略，最緊要係定好止蝕位，並嚴格執行止蝕。
麥狄文
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。