少做少錯 輕倉為上策
美股隔晚三大指數創新高後回吐，港股繼續區間運行，反彈一日後今日又回軟，恒指低開167點，一度跌215點，見26287點半日低位，但比預算中跌得少，之後A股倒升，恒指跌幅曾收窄至68點，見26434點半日高位。恒指中午收報26375點，跌126點；國企指數報10424點，跌63點；恒生科技指數跌1.2%，報8006點，險守八千大關。半日成交額598.51億元，預期愈接近聖誕節假期，成交會愈嚟愈縮水。
藍籌股個別發展，中海油(00883)繼續走軟，半日見6.5元近九個月低位，半日再跌1.8%，話咗唔好接飛刀博反彈，要懶醒兼貪平，只會得不償失。不過創科(00669)有大行調高目標價，半日升3.7%，跑贏大市，平保(02318)半日都升0.3%，大市跌勢唔算全面。
至於科技股今日普遍腳軟，JATMX中以美團(03690)最本事，先跌後回升，半日仲有0.5%進帳。而阿Man剛推介嘅阿里健康(00241)同樣拗腰，半日倒升0.6%。其他龍頭科網股阿里(09988)挫2.2%；騰訊(00700)跌1%，小米(01810)半日跌0.4%，但阿Man有信心小米今日內有機會收復失地。不過手機設備股受零部件缺貨影響，普遍受壓，舜宇光學(02382)更遇上關鍵零部件缺貨，11月手機鏡頭及模組出貨量均錄得按年及按月跌幅，股價半日挫3.1%。其他手機設備股受壓，丘鈦(01478)挫4%；瑞聲(02018)挫3%；比亞迪電子(00285)跌2.3%。
內需股有資金追捧，阿Man呢兩日叫留意嘅海底撈(06862)半日升4%，走勢見突破，只要企穩喺58元樓上，後市有機會再創新高。九毛九(09922) 有大行首評買入，股價半日升7.1%，有貨可以再坐一會。其他內需股普遍做好，閒閒地升幅都有4%或以上。
其實愈逼近聖誕節長假，市況會更趨淡靜，呢排都真係無乜嘢好搞，如果想長線投資JATMX，可以趁回吐嗰日分段吸納，升市嗰日就咪多手追貨，少做少錯，輕倉上為上策。
麥狄文
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。