急升後回調後市發展更健康
美股隔晚反彈，港股連跌三日，恒指瀉逾1600點後回穩，可惜彈力不足，今早曾反彈逾400點後升幅縮晒水，20日線(28681點)得而復失。恒指高開275點，早段最多升421點，見28972點半日高位，可惜彈力有限，可能跟周末前夕，資金普遍觀望，未肯積極買貨有關，20日線未能成功收復，一度低見28574點，僅餘24點升幅。其後大市回穩，但動力僅一般，恒指半日收報28652，升101點；國企指數漲53點，報11387；恒科指中午收9539，升166點。
騰訊(00700)為恒指提供大部份升幅，半日升3.6%，向恒指貢獻112點；美團(03690)旗下醫療健康平台上線，半日升3.5%，反彈力度跟騰訊不相伯重。小米(01810)發布隔空充電技術，加上美國延遲限制禁投公司死線，雖然美國未有表示放過禁令股，但至少仍持貨嘅外資，唔需要急要貨，就算要走都可以有秩序地慢慢疏散。一旦中美關係稍後有改善，喺禁投令5月執行前，小米或有機會甩身，擺脫被制裁厄運。阿里(09988)半日彈唔起，仍要跌2.1%，第二上市股份仍未獲納入港股通，阿里一直少咗北水呢個大買家，之前升浪已遠遠落後JTMX幾條街，回調跌市又要跟大隊向下，都算係雙重損失。不過阿里相對其他科網龍頭好抵買，尤其今年開始其雲業務將成為其盈利增長新引擎，現價當然可以收集建長倉，股價只要守住200至220都冇有怕。
今日基建設備股表現較佳，濰柴(02338)批准建議非公開發行130億元人民幣A股，中午大升14.6%；帶動整個板塊獲貨金流入，之前阿Man曾推介嘅中聯重科(01157)更中國重汽(03808)半日分別升7.9%及6.3%，行業龍頭升幅一定大過龍尾股。軟件股都係表現較佳板塊，板塊內股份閒閒地升逾3%。
不過港股今日彈力麻麻，暫時市況仍然反覆，加上周末前夕，都係少做少錯，維持輕倉上路，面對目前較為反覆不穩嘅市況，至少唔少人見大市回調，不斷表示股災殺到，對於呢啲言論，阿Man一笑置之，反正預咗春節前後內地較為水緊，大市急升後回調亦屬正常，休息只係為咗走更遠嘅路，阿爺一向只愛健康牛而怕咗瘋牛盲牛，目前嘅調整，正好畀大家冷靜一下。
麥狄文
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。