恒大系債務問題難解決 勿存幻想或接飛刀
隔晚美股個別發展，道指反彈261點，結束五連跌，標指亦升10點，只有納指跌9點。至於港股呢邊無乜方向，喺條20日線(25760)附近上上落落，好淡爭持。因為中秋節假期關係，北水由今個星期四暫停，北水相對保守，半日成交唔夠700億，買賣兩閒。
恒指高開13點報25827，升幅一度擴大至86點，見25900半日高位，其後大市掉頭向下，曾倒跌177點，見25636半日低位。不過20日線留下又見買盤吸納，大市止跌回升，大部分時間好淡爭持。恒指半日收報25800，跌12點；國指午造9208，跌30點；恒科指升2點，半日報收6597。
藍籌股個別發展，雖然阿里(09988)旗下螞蟻集團面臨拆骨，但可能噚日跌定先，今日跌不足1%，不過旗下嘅阿里健康(00241)半日跌3.8%，藍籌之中表現最差。中石油(00857)再下一城，半日再升5.3%，藍籌之中表現最好。呢期唔單止石油石化股有資金追捧，油服股今日全線炒高，不過勁升四成嘅華油能源(01251)跟半日升兩成嘅海隆(01623)跟百勒油服(02178)，全部屬於蚊型股仔，呢啲太過人為操控嘅股仔，一向唔係阿Man杯茶，話之呢堆股份炒到出煙，阿Man一於少理。
噚日阿Man講過點都唔會追入金屬資源股，今日呢個板塊全部見回吐，而鋼鐵股跌勢較明顯，跌幅由3%至7%不等。講真呢個板塊唔高追就肯定，連回吐亦無興趣買入，反而電力股阿Man有興趣回吐吸納，始終十年以嚟內地首度上調電費，加上個別電力股新能源發展進度理想，好似華潤電力(00836)跟龍源電力(00916)呢對龍頭電力股，近日不斷有大行上調目標價，趁回吐吸納有得諗。
雖然恒大(03333)掌舵人拍晒心口話一定對恒大投資者負責任，可借口講無憑，而集團表示9月合約銷售大跌，股價曾跌穿3元大關，半日股價跌近一成。同系恒大汽車(00708)半日更跌逾兩成，之前阿Man講過，恒大汽車點計條數都唔值幾百億，根本小米(01810)話用500億買起恒汽純粹吹水，恒大想賣恒汽套現應該無乜可能，睇嚟恒大系爆煲係遲早問題，真係咪對恒大系任何股份存有幻想，千祈咪多手接飛刀。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。