恒指幾乎全數回補上升裂口
聯儲局鮑爺對前主席沃爾克於1980年代戰勝通脹表示好正，咁市場當然就解讀為鮑爺可能效法沃爾克大幅加息，唔單止大家都認定嚟緊兩次議息會議都要加息0.5厘，甚至有人揣測聯儲局每次加息0.75厘機會大增。息魔出動當然令美股坐立不安，隔晚美股由升轉跌，高估值嘅科技股捱沽，而中概股繼續被退市陰霾所困擾，三大指數倒跌收市。而港股喺ADR跟夜期插水，今日港股當然低開。
恒指連續三日跌逾800點，今早再跌近500點，幾乎完全回補3 月中所遺下嘅上升裂口，20120至20786，其後跌幅大大收窄，似乎呢一輪調整有望告一段落。恒指低開420點，跌幅一度擴大至497點，見20184半日低位，其後A股一度倒升帶動跌幅收窄至81點，見20601半日高位。中午恒指報收20567點，跌114點，；國指中午報6936，跌25點；恒科指半日報收3955，跌34點。半日成交額589.4億元，以呢排嘅平均成交嚟睇，周末前夕嚟講都唔算少。
藍籌股以近日表現疲弱嘅港交所(00388)表現較為突出，雖然早段跌穿320元，接近3月中低位，但即反彈並率先回升，半日升2.5%，重上330元水平之上。港交所一向被視為大市嘅上落指標，今日港交所見底回升，如可保持升勢，有機會形成雙底形態，只係其估值唔算便宜，喺加息周期之中，自然無咁着數。至於重磅科技股，ATMXJ，以美團(03690)早段跌逾5%後拗腰兼轉燈表現最好，半日倒升0.4%；騰訊(00700)跟阿里(09988)半日跌逾2%，要大市止跌回升，佢哋兩個要出多兩分力。京東(09618)突然宣布考慮派發特別股息，將會喺5月4日前後經董事局表決，早段股價一度失守200大關，其後跌幅收窄至0.7%，200關口失而復得。京東出到息誘股東呢一招，資料顯示，該企去年底手持現金、現金等價物及受限制現金共766.92億元人民幣。不過京東喺現金水平高企下選擇派發特別股息嘅同時，意味住今年公司收購機會不多，不過始終市面上亦有一批好息之徒，對股價會有一定支持。
美國中概股繼續受除牌陰霾所困擾，理想汽車(02015)被納入美國預定除牌名單，半日跌2.7%，而其他汽車股偏軟，不過龍頭比亞迪(01211)半日先跌後回升，股價重上230水平，半日倒升0.4%，雖然比亞迪估值唔算特別平，但喺呢個板塊之中係不二之選，買股都係揀龍頭，更何況比亞迪係內地電動車市場一哥。
暫時牛證重貨區殺淨20000-20100呢一格，其他肥牛盡劏，估計呢一輸嘅劏牛行動有機會告一段落，而大市亦幾乎已全數回補上月中上升裂口，只要無乜重大利淡消息，港股再殺落去嘅機會不大。只係大市要回勇反彈，恒指要重上20800水平企穩，至少上面嘅熊證有否增加，亦係另一個挾淡倉嘅誘因。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。