憂慮阿爺收水 港股暫難走出困局
隔晚美股表現唔錯，可惜港股又跟唔上美股嘅步伐，內地3月CPI及PPI超預期，市場憂慮阿爺閂水喉，中港股市今早受壓。恒指今早高開144點報29152點，創3月19日以來新高，但已見咗半日高位，開市後即掉頭，一度倒跌265點，見28742點半日低位，回試20線(28728)。恒指中午收報28798點，跌210；國企指數報10997點，跌112點；恒科指報跌112點，報收8345點。
由於CPI同PPI高過市場預期，市場擔心阿爺收水亦係人之常情，高估值藍籌插水，藥明生物(02269)即使噚日有北水掃貨，今日股價亦要跌逾4%，藍籌之中跑第尾。美團(03690)亦難逃一跌，半日跌2.2%。騰訊(00700)、阿里(09988)跟小米(01810)講真估值唔算太高，但半日亦只有騰訊避過一劫，無起跌。反而本地地產股逆市靠穩，雖然本港實體經濟仍然呆滯，但近日樓市氣氛理想，無論一手或二手樓銷售表現不俗，地主佬今日成為逆市奇葩，恒隆地產(00101)跟新世界(00017)齊齊升逾1%。港交所(00388)則升逾1%，主要係中金有報告指，符合回歸港股上市嘅中概企業達19間，融資規模超過1700億元，市場暫時對港交所未來或被內地新交易所取替地位嘅困擾完全拋諸腦後。
資源股一向唔係阿Man杯茶，不過喺全球通脹升溫預期下，資源價格持續上升，而今年大部份資源股今年首季業績理想，相繼發盈喜，繼重鋼(01053)發盈喜後，中鋁(02600)亦表示首季盈利勁升30倍，兩股半日分別升27%及5.6%。馬鋼(00323)升2.3%、鞍鋼(00347)升6.6%。對於近日資源股持續嘅升勢，或者係時候重新檢視呢個板塊嘅價值，但今日係周末前夕，暫時唔建議高追，都係等回調再考慮吸納。半日成交額不足800億元，反映市場買賣兩閒，而阿Man已預視喺成交動力不足下，短期港股仍難走出上落市格局。
麥狄文
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。