成交低迷 波幅收窄 缸邊友無啖好食
美股上周五公布嘅7月非農數據遠超預期，令市場對經濟衰退憂慮退減嘅同時，相信聯儲局下月繼續加息0.75%預期升至六成過外，美股低開後跌幅收窄，道指更倒升收市。不過反映中概股表現嘅金龍指數則跌1.8%，今日科網股喺港股呢邊表現遍偏軟，恒指上周連彈三日，反彈逾500點後，今日回軟，喺20000附近爭持。
恒指低開136點，報20065後反覆向下，盤中最多跌223點，見19978半日低位。其後跌幅收窄重返20000水平，但始終仍要跌過百點。中午恒指報收20050，跌151點；國指跌75點，報6826；恒科指半日跌74點，報4341。半日成交額只有416.77億元，繼續買賣兩閒，港股缺水問題嚴重，一日無新資金流入，港股都難以走出悶局。
藍籌股個別發展，重磅科技網普遍下跌，阿里(09988)雖然業績叫好過預期，而軟銀以遠期合約代替喺市場沽貨，無奈業績都唔係標青，業績後捱沽都唔係好出奇，半日股價跌近4%，又失守90元大關，報89.25元，係半日表現最差藍籌股。騰訊(00700)跟美團(03690)半日跌逾2%，京東(09618)半日則跌3%。網易(09999)上周五因為終止合作開發遊戲股價下跌，但今日反而逆市升2.1%，成為半日表現好藍籌股，真係估佢唔到。加息預期再升溫，大笨象(00005)逆市升1.1%。汽車股回吐，但相對上周升幅，半日回吐幅度唔算多，吉利(00175)跟比亞迪(01211)半日分別跌1.7%及0.4%。
香港放寛入境隔離措施，從海外或台灣抵港，由7日酒店檢疫隔離，縮短至3日酒店檢疫及4日家居醫學監測。雖然政府已多次強調防疫政策唔會採取躺平態度，但縮短檢疫時間，總算向國際通關兼日後零入境檢疫邁向一大步。國泰航空(00293)半日升2.4%；而出行股縱橫遊(08069)跟東瀛遊(06882)亦顯著上升，只可惜成交欠奉，只係乾升無乜意思。
暫時港股仍未能擺脫窄幅上落市悶局，成交額維持淡靜，反映缸邊友無心戀戰，指數單日波幅亦有所收窄，大約200點嘅波幅之內，再加上低迷嘅成交，缸邊友實在難以搵食。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。