捱過七月反艇月 八月形勢未明仍反覆
港股七月反晒艇，一個月累跌近一成，上星期恒指落到24800水平兩次都識彈，姑且當24800係短期支持位先，踏入8月開局，表現反覆，但總算企返喺二萬六水平之上。恒指高開93點後，一度因為內地財新7月製造業PMI差過預期，跌咗217點，見半日低位25743點，但A股做好，帶動港股拗腰反升，半日最多升339點，見26300點半日高位。恒指中午收報26198點，升237點；國企指數報9303點，升69點；恒科指跌9點，報6772點。
大笨象(00005)中午派成績表，截至6月底止中期業績，列賬基準除稅前利潤108.39億元(美元‧下同)，按年飆升1.51倍。中期股息每股派7美仙，不設以股代息選擇。今時唔同往日，過往好多長線投資者鍾意以股代息，經過去年大笨象忽然暫停派息暴跌，依家都寧願揀息，現兜兜袋咗落袋先穩陣。半日金融股先偷步，大笨象(00005)跟恒生(00011)分別升3.6%及1.2%，友邦(01299)半日升0.4%唔算勁，港交所(00388)錄得3.4%升幅，上星期阿Man跌市只係揀呢隻撈貨，穩穩陣陣袋返一成利潤，好過唔知收市阿爺會有乜乜物物政策，唔使瞓唔著。不過上週急跌嘅科網股騰訊(00700)跟美團(03690)彈唔起，半日分別跌2.3%及1.2%，話咗呢堆股現價估值平咗好多都係咁話，暫時受政策影響唔明朗，避之則吉。碧服(06098)同樣腳軟回咗3.1%，反而安踏(02020)跌得有啲無厘頭，唔受政策影響，早段無啦啦跌近5%，中午跌幅收窄至2.8%。
新能源股持續強勢，尤其汽車股半日表現普遍不俗，另外另外，福萊特玻璃(06865)升12.8%；信義光能(00968)升2.6%；上星期無啦啦跟個市急跌，低位打咗靶真係無辜。鋼鐵期貨急挫，由於變種病毒肆虐，擔心經濟復甦較預期慢，對資源需求無之前預期咁大，鋼鐵股閒閒地跌6.5%至11.8%不等。不過金屬價格下跌，對重型裝備股反而有利，相關股份有資金追捧。
恒大系又有動作，中國恒大(03333)向騰訊(00700)等以每股3.2元出售11%恒騰網絡(00136)持股，恒騰網絡復牌彈32.2%；恒大升6.8%；恒大汽車(00708)升8%；恒大物業(06666)升3.6%。不過恒大系嘅債務問題始終棘手，呢一系股份從來唔係阿Man杯茶，講真每次有人問我對恒大系嘅意見，我都喺嗰句…….『恒大系就唔講喇….完！』。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。