改變舊有思想 莫戀棧劣勢弱股
新一年首個交易日，阿Man先喺度同各位粉絲缸邊友問好，祝願大家2021，買乜都得，旗開得勝，炒乜都醒。港股喺2021年首個交易日表現唔錯，低開後即拗腰倒升，繼續向好。恒指今早低開144點，早段曾跌151點，見27079點半日低位，之後拗腰造好，暫時倒升最多253點，見半日高位27484點，創去年2月20日以來新高。恒指中午收報27434點，升203點；國企指數報10719點，跌18點；恒科指半日高見8544點創新高，半日升108點，報收8534。
2021年港股開局有好開始，唔少藍籌股更創新高，包括阿Man嘅長期愛股港交所(00388)；仲有舊年愈批愈升，愈升愈勁嘅藥明生物(02269)；去年多次推介嘅安踏(02020)及蒙牛(02319)、仲有創科(00669)跟申洲(02313)，但藥明跟申洲創新高後半日倒跌。雖然今日個市上升，但都唔係所有藍籌股做好，「三桶油」或稍後被紐交所除牌，中海油(00883)跟中石油(00857)分別跌2.4%和1.3%。除咗「三桶油」之外，三大電訊商已確定將會被紐交所除牌，股價受壓。中移動(00941)股價創逾14年半新低，半日挫4%。中國聯通(00762)挫3.6%。中國電信(00728)半日挫4.2%；鐵塔(00788)創逾兩年低，半日挫2.6%。唔係阿Man睇死內地電訊股，話咗即使有5G發展，呢堆股票一樣炒唔起，與其死守唔得嘅垃圾股，倒不如痛定思痛，早日解決呢類股份，新一年要有新開始。
科技股一洗聖誕節假期前頽風，今年整個板塊做好，軟件硬件、平台經濟、雲計算及手游股全部有股落鑊。小米(01810)跟舜宇(02382)創新高，半日分別升半成和4.7%。騰訊(00700)升2.8%；美團(03690)升1.4%。不過得罪阿爺嘅阿里(09988) 跌2.3%，話咗阿里有排無運行，就算要博反彈，阿里完全唔係博殺清單。上月中阿Man曾推介嘅金山軟件(03888)創新高，半日升7.7%。小米阿Man預期今年有望突破萬億市值，股價連日上升，繼續向目標進發。至於上月長假前推介嘅明源雲(00909)半日升逾7%，升勢有餘未盡，睇嚟好快再創新高。
新能源概念股，今年仍然會係主題落鑊股，比亞迪(01211)半日升近一成創新高，吉利汽車(00175)相對落後，真係要急起直追。信義孖寶，大哥信義光能(00968)抖氣高位整固，細佬信義能源(03868)今手表現唔錯，穩步向住6元目標出發。新能源自踏入去年第四季持續受捧，阿Man亦開始陸續推介，算係喺新經濟股之外，搵到值得投資嘅舊經濟股，包括新能源股、內需股及消費股等。
不過傳統金融股仍然得唔到阿Man歡心，內銀股今日逆市下跌，主要係人行與銀保監將內銀房貸設限，房地產貸款佔比上限為40%，消息拖累整個板塊插水。四大行閒閒地跌1%以上。唔少缸邊友仍然守舊以為內銀股可以買嚟收息，今年仲唔改變買股係博資本增值，而唔係求收息呢啲舊思想，就難以擺脫去年落後於人嘅劣勢。
麥狄文
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。