教育股無晒錢途勿存希望
隔晚美股三大指數上升，皆因GDP數據差過預期，即係短期都唔會收水，話之經濟復甦有冇問題，美股繼續炒住先。至於港股噚日急彈後，話咗唔好追貨係要減磅，因為市況都係反覆，今日恒指又回返五舊幾，恒科指更跌逾4%，話咗基金沽咗貨就無咁快食回頭草，唔好對反彈太大期望。
恒指低開272點，報26042，其後沽壓再現，跌穿26000後跌勢加劇，臨近午市最多跌593點，見25721點半日低位。恒指半日收市報25762，跌553點；國指新造9141，挫273點；恒科指跌294點，半日報收6664。好彩嘅係半日成交縮返去1000億樓下，沽壓已相對早幾日大大減輕。
藍籌股個別發展，大笨象(00005)微升0.1%，相反友邦(01299)半日升1.4%；萬洲(00288)為半日升2.4%，為半日最大升幅藍籌。而海底撈(06862)插8%，係最大跌幅藍籌；藥明生物(02269)跟百威(01876)分別跌5.1%及4.5%。
科網股彈完一日又復走弱，始終投資者係對於監管風暴憂慮未除，即係阿爺派定心丸，都擔心係糖衣毒藥，既然噚日彈打開咗逃生門，梗係繼續減磅，ATM全部走軟，美團(03690)彈得多回得多，半日跌8.4%。快手(01024)沒有最低，只有更低，噚日已經唔識彈，今日半日再跌8.8%。其他科網股普遍跌2%以上。雖然有大行仍然睇好醫網股，但阿里健康(00241)、京東健康(06618)跟平安好醫生(01833)全線回軟，阿里健康半日又大跌9%。
教育股擺到明係被針對性打壓嘅行業，又唔畀外資投資，又唔畀融資，又唔畀收購，仲話補習要免費，咁樣其實點做生意，成個板塊肯定GG，噚日反彈四成嘅思考樂教育(01769)，半日大跌近兩成。
被打壓嘅行業當然死梗，相反有政策扶持嘅新能源行業就有運行，發改委擬建立尖峰電價機制，並稱為儲能創造更大發展空間，新能源及電池股逆市齊造好。板塊股份升幅由1%至最勁嘅超威動力(00951)半日大升38%都有，不過阿Man一向星期五好少買貨，今日亦唔例外。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。