新兩毒來襲或令疫情升溫
美股隔晚感恩節假期休市，今晚就只有半日市，以為感恩節可以安安落落，點知美國無啦啦向中國「送大禮」，喺中美元首視象會議後唔夠10日，當外界憧憬兩國關係緩和之際，美國竟將12間中資企業及機構列入「黑名單」。今次受制裁嘅實體或多或少跟半導體產業相關，亦牽涉量子科技領域，可見拜登政府都唔係真心想同中國friend番。除咗制裁消息之外，南非又有新變種病毒，令市場對疫情升溫再度憂慮。
恒指低開237點，報24502點已經見咗半日高，開市後跌幅持續擴大，最多跌547點，見24192點半日低位，創10月6日以來新低。恒指中午收報24213點，跌526點；國企指數報8626點，跌183點，恒科指則跌2.6%，三大指數都跌逾2%。好彩係半日成交額659億，又唔算特別多。
藍籌方面，只有石藥(01093)逃過一跌，其他藍籌齊齊過堂，海底撈(06862)深不見底，今日又跌半成，名符其實愈撈愈底。友邦(01299)跟大笨象(00005)齊齊跌逾2%，對恒指跌幅貢獻不少。不過最傷都係科網股，ATMX全線下跌，有傳國企限制員工用微信，另外，人行明年3月起禁止有明顯經營活動特徵的個人收款條碼用於經營活動收款，禁止個人靜態收款條碼被用於遠程非面對面收款，騰訊(00700)跌3%；阿里巴巴(09988)跌3%。美團(03690)今日收市派成績表，半日先隊3.9%，睇嚟業績唔會有驚喜，因為市場幾時都有春江鴨。其他科技股普遍受壓，喺美國又玩制裁下，阿爺又未停手監管，科網股繼續有波幅，冇升幅。
世衞新冠疫情技術部主管范科霍夫(Maria Van Kerkhove)表示，正監察一款新變種新冠病毒，擔心其可影響現有疫苗的保護力。外圍疫情升溫，出行股受壓，阿Man覺得唔錯嘅同程藝龍(00780)半日跌2%已經算好，另一同類股份 復星旅遊文化(01992)跌4.8%。至於憧憬內地即將通關嘅濠賭股，威咗兩日，今日又打回原形，閒閒地都跌4%以上。
周末前夕，例牌咪多手，仲要星期一結算，想安心渡周末，僅記輕倉上路，今日下晝都係食吓花生算，除非有啲筍價非買不可，好似比亞迪(01211)呢啲，如果有幸跌近或跌穿300，撈返些少，跌穿280打靶，都唔係話完全無得博。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。