新能源股回吐係上車好機會
雖然上周美國國會山莊曾發生暴亂，但個別事件對經濟、企業盈利及利率方向唔會有影響。而美國總統大選塵埃落定，兼且由民主黨全取國會參眾兩院控制權，令投資者憧憬更大規模嘅刺激經濟方案措施將落實，美股三大指數上周五再創收市新高，總括首周美股有個好開局，港股亦然。
港股跨年兩星期二連，累計升咗接近1500點，今早更上一層樓，成功重返二萬八水平。恒指高開125點，報28003，之後曾升298點，見28176半日高位，亦為去年1月22日近一年高位；其後升幅收窄至47點，報27925半日低位。臨近中午升幅再擴大，恒指中午升244點，報28122；國企指數升211點，報11167；科指171點，報8802點。國家統計局公布，2020年12月居民消費價格指數(CPI)按年升0.2%，高於預期；工業生產者出廠價格(PPI)按年下跌0.4%，勝預期。但回復通脹令A股半日低收。
今日係三大內地電訊商被紐交所除牌日子，唔少重磅指數包括MSCI明晟、富時羅素、標普道瓊斯等，都將三大電訊股剔出旗下指數。同時三大美資行已決定提早終止超過400隻衍生工具，但提前終止相關衍生工具係發行商自己決定，並將自願進行回購安排，以減輕相關產品提前終止對投資者及市場帶來嘅影響。其實呢批禁令股上星期已跌到一仆一碌，今日有反彈都好正常。三大電訊股分別反彈5.1至8.2%；中芯(00981)彈5%，中海油(00883)彈3.8%。阿Man不厭其煩再提醒大家，呢啲股份只不過係死貓彈，中線嚟講都係避之則吉。
科技股普遍做好，舜宇(02382)股價創新高，首次升越雙紅底；之前阿Man推介嘅萬國數據(09698)亦創新高，重拾紅底股身份，雖然萬國之前係行得慢咗啲，但終於都發力，呢幾日跑贏明源雲(00909)，又一次證明阿Man經常講嘅『價值只會遲到，不會缺席』。其他JATMX見阿里(09988)及騰訊(00700)半日分別彈1.4%及4.1%，兩股均不屬於美國最近公布嘅中國涉軍股名單，暫時少咗一重憂慮。
汽車股今日個別發展，上周五急升嘅吉利(00175)，今早再破頂後回吐，半日雖然倒跌0.6%，但吉利一日仲企定定喺30元樓上，呢個中期大升浪未有耐玩完。至於比亞迪(01211)今日特別搶鏡，股價半日升8.7%再創新高，公司喺哥倫比亞首都波哥大2020年度巴士項目招標中，接獲1002台電動巴士訂單。阿Man對新能源汽車股前景仍睇好，總之整個新能源板塊，今年上半年都仲係市場焦點，值得逢回吐吸納，今日唔少光伏股及風電股逆市回吐，話唔定又係上車好機會。
麥狄文
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。