新能源股揀信義光能博再創新高
美股上周五個別發展，疫苗開始推出市場民眾可接種，拜登入主白宮亦塵埃落定，相關利好消息已消化得七七八八，喺今個星期聯儲局議息前，美股呈拉鋸局面，港股亦無乜方向。港股上周跌330點，連跌兩星期，今早好淡爭持。
恒指高開16點報26522，開市無耐曾倒跌99點，見26406點半日低位，其後喺A股造好帶動下反彈，曾升38點，見26544點半日高位，又復偏軟。恒指中午跌25點，報26480；國企指數升15點報10468；恒生科技指數跑贏，升36點，報8116。
藍籌重磅股以小米(01810)表現最威猛，「雙12」銷售表現強勁，股價今早創新高，半日升近半成，報28.9元，睇嚟要見30元指日可待。阿Man一向睇好小米，較早前小米配股集資令股價震盪，阿Man已大聲疾呼要掃貨，當日24元水平有跟住買貨，兩個星期唔夠賺兩成有，確係可以過個開心聖誕。至於中海油(00883)連彈兩日，半日升4.2%，不過油價前景阿Man唔係咁睇好，石油股始終唔係阿Man杯茶。舜宇(02382)上周因上月出貨數據欠佳捱沽，今日反彈，不過留意阻力喺153元，有博反彈嘅 見好要識收。
科網股表現迴異，由於中央政治局會議提到要強化反壟斷和防止資本無序擴張，電商及團購龍頭有沽壓，美團(03690)曾插逾7%，半日跌幅收窄至3%，阿Man今早有指導付費聊天室會員喺280元趁低吸納，兩個星期第二次低吸機會，把握得到半日輕輕鬆鬆又head住十蚊八蚊。不過京東(09618)半日跌1.5%，創超過一個月低位；阿里(09988)跟騰訊(00700)半日分別跌1.5%及1.9%，由於美團跌幅較深，今早低吸較其他重磅科網股更具值博率。雖然京東唔多精神，但阿仔京東健康(06618)一度升近一成，半日升7.5%，創上市新高。
國家主席習近平表示中國將有一系列新舉措，為《巴黎協定》作出更多貢獻，包括降低碳排放量，新能源股普遍上揚。新能源股又落鑊，包括之前一直喺20元水平橫行嘅福萊特玻璃(06865)半日升逾一成，成交配合走勢突破，留意福萊特25元樓上蟹貨唔少，呢啲位追貨睇住食糊。其他新能源股普遍向上，半日閒閒地升4%或以上。如果要揀新能源股博一博，阿Man揀信義光能(00968)，若然成功升破14.2元，消化蟹貨重磅區，有機會挑戰之前15元幾個頂，再創新高。
麥狄文
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。