期指結算前反彈 成交未配合難向上突破
美國債務上限談判又遇阻滯，上周五美股轉升為跌，三大指數回落，市場仍等待談判結果。不過阿Man完全唔擔心美國出現債務違約，每次債務上限談判到最後死線前，兩黨最終定有共識，死線之前各不相讓，都係做政治秀，在野黨定最盡方法去攻擊執政黨，為自己撈最多政治籌碼，但大家都無想過任由美國債務違約，所以到6月1日死線前，就繼續玩吓嘢，死線當日雙方必能達成協議。
至於港股表現反覆，早段恒指高開28點後，一度倒跌40點，見19410低位，但呢個1月份低位確係硬淨，無再下試上周低位後，大市掉頭向上，最多升334點，見19784，不過10日線(19739)得而復失，10日線唔係咁易企返穩，半日恒指報收19702，升252點；國指升104點，報收6697；恒科指升91點，跑贏大市，報收3913。半日成交額537.4億元，都係咁上下，並未隨指數這升而見顯著增加，缺水問題未有改善。
藍籌股普遍做好，友邦(01299)除淨前升2%，似乎又有好色之徒出嚟搶下息，但阿Man一向唔貪收息，友邦股價暫時險守80元水平，走勢未見明顯改善，只係低位整固，暫未算真正轉勢。至於大笨象(00005)半日升0.5%，暫時股價仍受制60元阻力，要企穩60元水平先會有較明顯突破。科網股回升，快手(01024)公布業績前炒上，股價半日升6.3%，不過騰訊(00700)跟阿里(09988)同樣業績前炒上，績後股價見光死，小心今日追入快手，業績公布後又被割韭菜。ATMJB全線回升，升幅由1%至3%不等，都係嗰句，大市喺現水平都仍未見資金大量流入，只有零星留喺市場內嘅資金於不同板塊之間輪動，升市追貨隨時又係得個坐字。
生科股及醫療股今日見反彈，藥明生物(02699)半日升5.8%，藍籌之中表現最好，其他相關藍籌股，阿里健康(00241)半日升4.5%，翰森製藥(03692)半日升3.7%。其他藍籌股普遍靠穩或隨大市向上，比亞迪(01211)半日升3%，主要係中汽協稱內地首四個月十大新能源車廠銷量，按年升近六成，汽車股整體走強。其他汽車股閒閒地錄得2%升幅或以上。
中資電力股今日亦有唔錯表現，藍籌新貴華潤電力(00836)半日升4.7%，其他火電股半日亦錄得4%或以上升幅。新能源股龍源電力(00916)半日更升逾7%，喺8元水平嘅龍源電力前阿Man都有推介過，不過上到9至10元又見阻力，要突破10元重返雙位數，都需要一啲時間。
港股喺期指結算前，總算守咗19400呢啲大支持位，不過10日未能企穩，而250日線亦係危危乎隨時下破，咁嘅情況下，即使結算前呢幾日唔再向下突破，難保結算後唔會向上再穿位尋底。暫時仍未見有大量資金入場，嚟到二萬樓下呢啲位，港股喺估值上，相對其他市場應有一定折讓，偏偏外資之前減持咗啲重磅股之後，都未肯重新入場，睇嚟都係沽資套現後已一去不回頭。港股欠缺成交配合，上升乏力，即使估值算便唔再大跌，但都未能提供搵食機會，五窮月雖未至太窄，但六絕月都難有條件絕地反擊。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。