期望管理上 新世界跟領展高下立見
隔晚美股反覆，三大指數先跌後回升，不過人民幣今早再度腳軟，A股拖累下，港股今早再跌，目前險守20000大關，或考驗250日線(約19993)。恒指低開127點，開市價20223已經係半日高位，大市繼續捱沽，半日最多跌344點，見20006半日低位，創近兩個月新低。中午恒指報收20063，跌287點；國指跌122點，報6737；恒科指跌86點，報收4062。半日成交額574.52億元，未見顯著增加，周末前夕例牌成交淡靜。
藍籌股普遍下跌，阿里(09988)交出一份優於預期嘅季績，無奈半日仍要跌4.3%；至於網易(09999)上返少賺27%，半日股價挫近一成，藍籌之中表現最差。至於被沽空機構出報告狙擊嘅創科(00669)，強烈否認有關沽空機構報告指引，復牌後股價半日升半成，但經過早兩日急跌，元氣大傷，反彈阻力82-85元，想重返紅底股，睇怕要啲時間消化噚日咁大成交嗰枝大陰燭。至於銀河娛樂(00027)季績改善之餘，亦憧憬今年新項目令業績大翻身，股價半日升逾半成，係表現最好藍籌股。
美國再度憂慮喺通脹高企下，加息步伐未能放緩，科網股等高增長股捱沽好新正，本港嘅科網股亦走軟，ATMJ全部難逃一跌，跌幅由超過2%起標，當然最樣衰係網易跌咗近一成。除咗科網股，汽車股亦捱沽，龍頭比亞迪(01211)半日跌0.3%算硬淨，早兩日逆市上升嘅長汽(02333)半日跌7.7%，幾乎將呢兩日嘅升幅抹走晒。其他汽車股跌近2%至7%不等。比亞迪即使被股東大幅減持，但以勢輪勢，幾時都係要買嘅汽車股首選。
領展(00823)今日除權，即係股東無論決定供股與否已塵埃落定，領展水緊供股呢單嘢，確係嚇親唔少人，而領展宣布供股集資後，市場亦開始揣測邊個會係Next，而一直被視為gearing raitio較高嘅新世界發展(00017)，當然係焦點之一。不過噚日新世界公布業績嘅同時，集團舵手鄭志剛就向股東派定心丸，指公司無向股東集資需要，集團唔使抽水。新世界公布嘅上半年業績，上半財年基本溢利減少14%至33.6億元，列賬純利跌15%至12.09億元；中期息0.46元。市場最關心係新世界嘅財務狀況，公司表示到期貸款再融資已搞掂晒，目前可動用資金仲有大約920億元，包括茄薯同銀行結餘都有大約570億元，另加可以用嘅銀行貸款350億元。公司唔向股東伸手度水，仲要有息派，股東都算飲得杯落。
另外，新世界亦表示將檢示集團整體架構，研究下有乜方案可以釋放業務價值，雖然暫時未有乜嘢具體方案，但有分析就指新世界有望將近年業務表現良好嘅K11集團分析上市，有助改善綜合企業常見嘅折讓問題，釋放其資產價值，可以為股東創造長遠價值。值得留意係K11業務係集團剛公布財內期內少數錄得增長項目，未來繼續發展K11品牌，預計至2027年度，於中港合共有39個K11項目，面積達290.6萬平方米。
單睇K11集團嘅業績，中港通關復常，最壞時間已經過去，而K11 Musea今年2月初至今嘅銷售額，更加係上年同期兩倍，當中內地客佔銷售額上升近四成，可以話食到正內地通關條水。而K11 Artus亦受惠內地通關，2月初起內地住客較去年同期升4倍，出租率超過七成。K11有咁好成績，係要多得公司早著先機，大規模喺內地作線上推廣，以及跟旅遊平台合作，針對性策略吸引高端客群等，下半年K11零售會出現V形反彈亦相當合理，分拆K11集團唔係無得諗。
喺中港兩地通關後，本地樓市亦從去年Q4嘅低谷反彈，公司截止2022年12月31日，香港已出售但未入賬既物業收益，有185億港元，會喺今年下半財年入賬，另有亦有近43億港元，會喺2024財年入賬。至於內地方面，已售但未入賬嘅數有人民幣12.9億元，會於2023年下半財年入賬；另外有8.6億人民幣，會喺2024財年入賬。內地物業銷售成績亮麗，可以話係跑贏大市，去年7月至12月銷售總額達92億元人民幣，已經完成全個財年目標60%，有信心超額完成。此外，興建中嘅航天城11 Skies、啟德體育園等大型地標項目，陸續會喺今年底至2024年初落成，將為集團帶嚟新嘅穩定收入來源。新世界今次份成績表都算見得人，重點後集團表明唔向股東抽水，並研究分拆業務為股東創更佳價值，總好過領展喺新加坡買咗件貴嘢，做完水魚就問股東伸手，喺期望管理上，顯然係新世界表現更佳。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。