比亞迪批股集資為未來發展
美股上周五持續做好，三大指數齊創收市新高，不過中概股繼續無厘神氣，睇嚟美國投資者真係怕咗阿爺嘅政策，三朝唔埋兩日就向唔同板塊開刀，唔想被割韭菜，只有選擇離場。另一方面，中國製造業動連續兩個月陷入收縮，加上內地疫情反覆，港股11月開局低走。
恒指低開108點，報25268點，20日及50日線滙聚區(25280)失守，見過25270點半日高位後跌幅擴大，二萬五關失守，半日最多跌404點，見24927點半日低位，其後A股回穩帶動港股跌幅收窄。恒指中午跌278點，報25098點；國指跌75點，報8886點；恒科指半日跌108點，報收6266點。
藍籌股之中，今日金融股表現較佳，可能因為本周多間央行議息，而喺息口趨升下，對銀行股利好，招行(03968)半日升1.4%，其他內銀股亦靠穩或逆市上升。平保(02318)半日亦升1.3%，國壽(02628)半日亦升1%。其他藍籌股個別發展，科技股受壓，騰訊(00700)跟阿里(09988)半日跌逾2%。
比亞迪(01211)折讓近7%配股集資約138億元，股價守住批股價276元，甚至連280元亦守住，半日跌幅收窄至2.6%，比起其他汽車股，跌幅唔算大，長城汽車(02333)半日跌3.6%，吉利(00175)半日跌2.4%。其實汽車股致力研發電動車，需要投入大量資金進行研發，以及擴充生產線，向市場集資係必然嘅事，只要集資後，資金可幫助到公司發展，加上喺國策扶持下，汽車股只要一直喺正確嘅發展道路上，前景仍值得睇高一線。如果大家好記性，都會記得過往兩年藥明生物(02269)都係一直透過配股集資覓得資金發展，而公司業務發展一日重里，股價都係愈批愈高，只要業績交到功課，批股並唔係世界末日，反而係畀投資者一個低吸好機會。
醫療保健股今日跌幅較為顯著，主要係近日國家衛健委發布關於互聯網診療監管細則(徵求意見稿)，預計隨著線上覆診行為流程監管落地，行業中部分不規範的線上問診行為或將在短期內解決，並對處方藥銷售嘅增量業務有一定程度負面影響。但凡行業整改，短期陣痛少不免，但長遠嚟講對行業發展係好事，不過短線股份難免受壓，又要調整一下。
今日有幾隻停牌時間較長嘅公司復牌，當中升得最勁係重功重組獲「白武士」鄭志剛入股嘅裕承科金(00279)，前稱「民眾金融科技」嘅裕承科金，半日升逾兩倍，不過呢啲股都係食花生，無貨根本無得追。至於另一隻停咗七個月嘅保利協鑫(03800)，復牌後再現其過往喪炒本色，半日股價升逾六成，不過阿Man對於保利協鑫都係眼看手勿動，呢隻股份出咗名人為操控，加埋北水參與，炒得更加癲，就算參與炒作，都盡量即日計數，免夜長夢多。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。