比亞迪拖累汽車股下跌或提供上車機會
美龨指數升至20年高位，市場對美國通脹憂慮再度升溫，隔晚美股三大指數走軟，納指更跌逾2%，喺明晚美國公布通脹數據公布前，美股偏軟。而內地疫情反覆，澳門防疫措施再收緊，亦令避險情緒升溫，中港股市受壓，恒指上日跌601點後，今早繼續偏軟，失守50日線(21029)。
恒指低開219點，甫開市已失守21000心理關口及50日線，早段跌幅一度收窄至40點，但內地股市偏軟，A股創業板指數更跌逾2%，拖累港股跌幅再度擴大，一度跌344點，見20779半日低位。半日恒指重上20800水平，跌255點，報收20869；國指半日跌121點，報收7199；恒科指半日跌99點，跌逾2%，報收4523。半日成交額675.8億元，又唔算特別多。
藍籌股又唔係全線仆直，友邦(01299)跟大笨象(00005)半日逆市分別升0.2%及0.6%，兩呢隻指數權重股，算係撐住個市唔使跌咁多。不過科技股就整體受壓，唔少科技又因為違規而罰款，雖然金額唔係大，相對相關被罰科企嘅收入係九牛一毛，但令市場憂慮監管重臨，又或者係根本未如預期終止或放鬆。一講到監管，市場當然最擔心阿里(09988)，噚日顯著下跌後，今日再跌逾半成。騰訊(00700)預咗跌有佢份，升就無乜力，半日跌1.3%，喺南非股東持續減持下，公司出手回購，頂多都係唔上唔落，暫時大升無佢份，反彈亦弱過人。至於阿Man較有心水嘅京東(09618)跟美團(03690)，半日分別跌3.1%及1.2%，兩股均已去到收集範圍。其他科網股普遍下跌，不過要買都係揀咗龍頭先。
汽車股今日好明顯受比亞迪(01211)拖累整個板塊走軟，CCASS顥示超過2億股股份轉咗入花旗戶口，市場揣測主要股東巴菲特旗艦基金巴郡或減持，但比亞迪證券事務部向內地媒體稱，目前未睇到數據係股神持股數目有變動，只係市場都係擔心，比亞迪半日仍跌逾一成，藍籌之中表現最差。其他汽車股普遍腳軟，不過新能源汽車股受國策支持，或者呢次調整係買貨機會。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。