泊到騰訊都未必一定係好事
美股上周五大好環境，三大指數上升，市場對聯儲局提前收水憂慮緩解，內地又因為疫情反彈，難於短期內再收緊銀根，以為喺水喉續開嘅情況下，今日港股有運行，奈何內地A股表現偏軟，拖累港股高開低走。恒指高開67點，曾升85點，見29003點半日高，可惜二萬九得而復失，一度倒跌302點，見28615點半日低，曾跌穿20日線跟50日線匯聚區(約28680)。恒指中午報28695點，跌222點，險守匯聚區上；國企指數報10728點，跌76點；恒科指跌74點，報8021點。
藍籌股普遍偏軟，上星期係威係勢嘅吉利(00175)，今日終於要回吐，半日跌4.7%，不過回吐可能係上車好機會，吼位喺21樓下，睇下有冇機會收集。小米(01810)亦跌近5%，之前強咗咁多日，今日跌穿咗10日線，暫時睇住27.5至28元守唔守，呢個位應有一定支持。其他重磅藍籌股友邦(01299)同港交所(00388)分別跌1.2%及1.7%，睇嚟個市未有能力向上突破住，之前阿Man已多次強調，要突破向上嘅先決條件係成交要配合。萬洲(00288)計劃斥資150億元進行回購，復牌半日升近8%，都係嗰句，急升高追多數中伏，都係食下花生算數。
內地疫情反彈，廣東省嚴陣以待，澳門政府再收緊來往廣東的出入境措施，明日上午10時起，所有往返廣東與澳門的人士，須持有48小時內的核酸檢測陰性報告。濠賭股難免捱沽，整個板塊都有沽壓，跌幅由1.8%至3%以上不等。
資源股繼續有追捧，雖然美國多次強調，通脹只係短暫及暫時性現象，不過市場當然無咁輕易相信，石油及金屬價格持續高企，就算阿爺出手打壓，以防資源價格大漲引發通脹急升，相關股份回調後，再吸引資金流入。
恒大系繼續走軟，上周其債券價格急挫，而係內旗艦恒大(0333)已被踢出富時中國50指數，半日跌3.3%；低價批股嘅恒大物業(06666)則見反彈，不過股價插到走晒樣先反彈1.5%，都係杯水車薪。至於恒大汽車(00708)表示五款恒馳電動車，於夏季進行測試，不過市場似乎唔多受落，半日股價照插水5.5%。至於系內跌最多係恒騰(00136)半日跌6.2%，所以呢，唔一定泊到騰訊(00700)就係好，恒騰股價嚟到呢個水平，已差不多重返2月初時喪炒上去嘅起步位。
講開泊住騰訊呢個大碼頭，今早寰亞傳媒(08075)宣布引資騰訊附屬，股價一度狂升八成，其後升幅收窄至兩成，話咗高追死硬，若然咁唔好彩多手追貨，真係要忍痛止蝕咪心軟，幸而無論寰亞抑或母公司豐德麗(00571)成交唔算多，散戶都唔係個個咁笨，後者更加係乾升，呢啲質地嘅股份，都係少沾手為妙。
麥狄文
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。