港交所雖被調低評級長線仍可收集
雖然上周五美股因為通脹壓力緩和，道指跟標指再創收市新高，但因為內地今早公布7月份「三頭馬車」數據全遜預期，港股半日腳軟，恒指跌近200點。恒指低開26點，開市曾轉升58點，見26449點半日高位，一度重上20日線(約26422)後再度受壓，可惜10日線(約26369)跟20日線得而復失，半日最多跌289點，見26101點半日低位。恒指中午報收26195點，跌196點；國指跌99點，報收9277點。官媒最新評論文章指出要對肆意篡改歷史嘅網絡遊戲「零容忍」，恒科指半日跑輸大市，跌157點，報收6431點。
央廣網喺上周六發表文章，批評有網絡遊戲歪曲歷史，把岳飛設計為「肉袒牽羊」的投降者形象，稱網遊行業必須加強自律，肆意篡改歷史的網絡遊戲當治理。手遊股受壓，騰訊(00700)周三公布業績，但整體手遊股全線受壓，騰訊跌3.2%；其他手遊股閒閒地跌2%以上，嗶哩嗶哩(09626)半日創上市新低，半日跌8%。除咗手遊股之外，軟件股跟雲計算股同樣走弱，睇嚟喺阿爺監管風暴下，呢個板塊仲有排頽。
除咗手遊股跌到一仆一碌之外，新能源股今日亦無厘頭插水，其實呢個板塊一直受政策扶持，今日無啦啦插水，有貨喺手都幾無耐。至於無貨喺手，可能係收集好機會。只係今日呢個板塊回吐壓力唔細，想買貨都係分段買穩陣。而新能源相關股份，阿Man心頭好係贛鋒鋰業(01772)，今早150元稍作爭持，呢個位有支持，考慮呢個位收集，跌穿140元止蝕，博佢重返160企穩，再挑戰高位，都叫有數得計。
繼續有唔少重磅股公布業績，今日輪到舜宇(02382)，股價早段曾跌至206.2元低位，半日跌幅收窄至2%，如果守得住220元，走勢又唔係太差，等業績出埋可以留意。至於港交所(00388)半日跌2.2%，業績公布後被大行調低評級，股價受壓，失守500水平。不過港交所始終做獨市生意，500元樓下收集，中線投資係可攻可守選擇。
之前阿Man推介過嘅創科實業(00669)再創169.9元新高，半日再升1.8%。至於內房股雖然阿Man唔多睇好，不過國家統計局指，各地區各部門堅持房住不炒，持續穩地價、穩房價、穩預期，房地產市場有望保持平穩發展，今日內房股表現唔錯。只係三道紅線下，內房股難以再好持以前咁好搵，要選擇內房股都要堅持揀負債較低嘅一線龍頭。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。