港股乏成交 弱勢未改宜忍手
美股隔晚表現反覆，早段道指曾跌逾429點，主要公布小非農新增職位20.8萬份，反映美國職位未有快速萎縮，尤其是9月私人機構薪酬升幅達到7.8%，遠超預期，即係就業市場唔算太差。就業市場仲ok，美聯儲就有條件繼續加息。加上連聯儲局鴿派官員都加把口，話目前無減息空間，美股早段死死下。不過去到低位又見有買盤出嚟買下嘢，雖然隔晚美股成交唔係大，但尾市入場買盤，總算令三大指數跌幅收窄。其實早兩日美股勁彈，主要係英國彈弓手，撤回減稅方案，美匯指數回落，債息同VIX亦從高位略為回落，造就美股嚟一下勁彈，不過美股始終未擺脫熊市陰影，尤其喺聯儲局要控制通脹大前題下，而就業市場又提供咗加息空間，睇怕美股仲有排反覆。
至於港股噚日報復式反彈逾千點，但成交只有1055億，成交額講唔上配合升幅，今日港股見回吐都好正常。恒指高開12點，開市報18100已經係半日高位，其後隨即向下，最多跌129點，見17958半日低位，大部份時間喺萬八水平爭持。半日恒指報收18010，跌77點；國指跌42點，報6181；恒科指跌33點，報3651。半日成交額又縮水至只有340.7億元，噚日升過千點都唔見成交大增，今日成交縮水亦正常，話晒北水仲放緊假。
藍籌股個別發展，ATMJ只有美團(03690)半日仍保持升幅，半日升0.2%；騰訊(00700)、阿里(09988)半日分別跌0.7%及0.4%；京東(09618)噚日升一成之後，今日回吐2.6%，又重返210水平之下。本地地產股今日表現唔錯，當中以九倉置業(01997)半日表現最突出，升4.2%，其他本地地產股則錄得少於1%升幅，但都算跑贏大市。友邦(01299)半日靠穩，守於70元水平之上，半日報收70.25元；大笨象(00005)半日則跌近1%。內險跟內銀股回吐，只有平保(02318)半日仍靠穩無起跌。
汽車股明顯受壓，比亞迪(01211)噚日反彈企唔穩喺210元之上，弱勢未改，半日跌3%，報收203.4元，小鵬(09868)跟蔚來(09866)半日分別跌8.2%及7%。傳統汽車股同樣受壓，長城汽車(02333)半日跌逾8%，吉利(00175)半日跌4.8%，成為表現最差藍籌股。呠呠車唔掂，但飛機就起飛，市場憧憬十一黃金周內地旅遊業暢旺，相關出行股做好，尤其航空股表現突出，國航(00753)半日升4.5%，東航(00670)升逾5%，南航(01055)更升6%。首都機場(00694)跟中民航信息(00696)半日分別升逾1%及2%。攜程(09961)跟同程(00780)半日升4.3%及2.1%。
港股激彈一日又回復平靜，暫時大市喺萬八點爭持，無咩方向，萬八關能否企穩仍屬未知數，多條移動平均線，僅收復10日線(17661)，20日線(18276)咁啱係接近三月份低位18200水平附近，連呢個位都未企得返上去，就算噚日升咗過千點，港股都未講得上係乜嘢轉勢，只係熊市反彈就係咁嘅款，大戶要挾死淡友，一兩日就可以挾升千點，令淡友投降，轉個頭外圍有乜冬瓜豆腐，港股又回復跌跌不休嘅弱勢，呢啲時候就只有耐心等待，要捱得過熊市嘅寒冬，保持實力，只有資格參與下一次牛市。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。