港股乏成交陰乾下試三月低位
美國債息略為回落，隔晚美股伺機反彈，納指終止七連跌，隔晚彈逾2%，升246點；道指跟標指則分別升435點及71點。業績期過後，市場暫時無乜消息，歐洲央行今晚議息，議息前歐洲股市隔晚亦見反彈，市場早已消化加息0.75%，不過議息後有乜嘢講先係重要，嚟緊加息路徑如何。面對高通脹但經濟下滑嘅慘況，歐央行加息再又死，唔加息又快。不過油價回落，兼且資源格價全面向下，對壓抑通脹有一定作用，即管睇下今晚歐央今晚議息有乜嘢講。
至於港股今早未有跟隨美股反彈，主要係內地股市偏軟，加上市場等侍歐央行議息，港股無乜方向，但半日再度失守19000大關，半日波幅只有155點，成交進一步縮水至半日不足400億元。
恒指幾乎平開，最多升31點，見19075半日高位，其後回軟，半日多跌124點，見18919半日低位，至中午收市跌幅略為收窄。恒指中午報收18969；國指跌25點，報收6487；恒科指幾乎無起跌，報收4015。
藍籌股個別發展，大笨象(00005)跟友邦(01299)齊齊跌0.8%；成交持續萎縮下，港交所(00388)偏軟，半日跌0.3%。騰訊(00700)主要股東南非基金將2%股份轉入CCASS，市場揣測南非佬又準備沽貨，股價受壓，半日跌2.4%。不過美團(03690)、京東(09618)跟阿里巴巴(09988)則齊齊升1%。其他藍籌股都係咁上下，乏善可陳，半日大市波幅窄到咁，完全係趕客格局。
內房股今日又腳軟，有大行指內房股未有耐翻生，建議趁反彈減持財務問題較嚴重嘅內房股，至於買唔買財政實力比較好，具國企央企背景嘅內房股，阿Man就有保留。成條產業鏈死到直一直，短期難以扭轉劣勢，內房股有排無運行。
油價跟資源價格回落，三桶油跟油服股下跌，相反，航空股向好，不過內地仍然行緊清零政策，疫情反覆下，耐不耐又話封呢度，封嗰度，對外開放邊境更加遙遙無期，航空股趁油價落炒一炒，可能都係好短癮。
港股失守萬九大關後，暫時喺19000點爭持，不過持續低迷嘅成交，反映無資金願意入場，咁嘅情況下，個市都係易跌難升，加上又無乜好消息且力，好友都頂得好辛苦，既然都穿咗萬九大關，久守必失下，恒指大有機會再下試18200至18500水平，即係3月份低位。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。