港股估值唔貴亦無人問津
隔晚美股終於識得彈，道指早段曾跌近300點，收市倒升145點；標指同樣先跌後回升，收市升11點。不過納指則連跌5日，隔晚再跌31點，但跌幅已較盤中低位大大收窄。今晚美國將公布就業數據，一旦數據強勁，聯儲局加息無障礙，鮑爺講到明以控制通脹為首要目標，數據強勁就大條道理加息。相反，就業數據疲弱，雖然聯儲局加息未必咁狠心，但疲弱數據則反映勞動市場轉弱，消費者信心亦將走軟，係經濟衰退警示，而有分折指美國經濟步入衰退嘅可能性已高於五成。市場靜待今晚嘅就業數據，睇下聯儲局對個數據有乜嘢反彈。
美匯指數爆咗上去廿年高位，逼近110水平，歐元跟日圓都跌到一仆一碌，下星期歐央行議息，喺通脹高企下，市場普遍預期歐央行將加息0.75厘。而喺美元強勁嘅同時，油價跟資源價格則回落，通脹有望喺短期內見頂，但要掉頭回落，睇怕都仲有一段時間，股市喺咁嘅情況下，都係瓜多過菜。
港股9月開局已跌咗357點，今日表現繼續疲弱，恒指低開24點後，早段曾倒升33點，見19630半日高位，可惜多條移動平均線失守後無法收復，弱勢持續令指數再度回軟，盤中曾跌204點，見19392半日低位，其後跌幅略為收窄。半日恒指跌121點，報19475；國指跌53點，報6688；恒科指半日跌40點，報收4176。半日成交額只有440.14億元，本來港股成交已經係淡靜，今日周末前夕，更加無人願意入場。
藍籌股普遍下跌，友邦(01299)更跌至三個月低位，半日跌1.6%，連75都失守；大笨象(00005)半日跌0.6%，50元水平這麼近，那麼遠。喺股神減持陰霾下，比亞迪(01211)繼續下滑，失守240元後，下一個支持位喺220元，半日再跌近2%，睇個款仍要向下尋底。至於ATMJ，騰訊(00700)計劃變賣手上投資套現千億元，雖然未有指明要減持美團(03690)，但市場一於少理，美團噚日跌幾個%，今日未能止跌，半日再跌0.4%。阿里(09988)半日跌近1%，同樣無運行。至於京東(09618)早已被騰訊當作禮物派送予股東，呢一輪減持資產無佢份，股價半日靠穩，微升不足0.1%，總算守住240元支持位，四大科技股之中，表現已係最堅挺。
內房股集資壓力未除，碧桂園(02007)跟旭輝(00884)已先後配股抽水，估計呢啲集資活動陸續有嚟，今日整個板塊受壓，唔少股份半日閒閒地跌3%或以上。物管股同樣無運行，老母唔掂做仔嘅又點會好，整個板塊繼續受壓，跌幅由超過1%至5%不等。
本來港股已經係靜靜局，無節目，嚟到周末前夕，更加無人願意入場，既然無資金入場買嘢，市況偏軟亦屬正常。 更何況諗嚟諗去都搵唔到乜嘢利好消息支撐個市向上，雖然家陣港股估值唔算貴，但平嘢都無人問津，港股繼續一潭死水。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。