美股隔晚休市，歐洲股市則略為回吐，不過人民幣再度走弱，兌美元反彈至7.22已無力，今早再下破7.24，逼近7.25又想創新低。加上中國公布6月服務業PMI差過預期，港股早兩日反彈近500點後，今日跌逾200點，已抹去過去兩日逾半升幅，再度失守20日線(19330)。
恒指低開86點，跌幅一度收窄至36點，見19378，但內地數據一出，大市即倒水式向下，半日最多跌302點，見19113半日低位，叫做喺10日線(19099)有啲支持，跌幅落為收窄，半日跌268點，收19147；國指則跌116點，報收6496；恒科指險守4000，半日收4015，半日跌58點。半日成交額427.39億元，維持低水平，港股都係買賣兩閒，升跌都係無成交，
藍籌股整體向下，ATMJB全線向下，騰訊(00700)、阿里(09988)跟百度(09888)全部跌超過1%，美團(03690)跟京東(09618)更跌逾2%。港交所(00388)又重返300元樓下，半日跌2.2%；大笨象(00005)半日跌0.6%；友邦(01299)半日跌近1%。
為咗反制美國對華輸出AI晶片，中國中國商務部及海關總署宣布，8月1日起對鎵、鍺相關物項實施出口管制，未經許可不得出口，呢個舉動係明顯為咗反擊。稀土股因為呢個原因炒上。其實阿Man又唔係好明，限制出口唔係會影響銷售額咩，竟然仲可以因為呢個理由炒上去，莫名其妙。中國稀土(00769)升8%，升勢有未盡，金力永磁(06680)更升近一成，但成交有限，無中國稀土咁熱炒。其他板塊內嘅股份，普遍錄得2%以上升幅。
服務業PMI差過預期，餐飲股捱沽，全個板塊無一倖免，全部跌超過3%；零售股亦遭殃，李寧(02332)半日跌5.1%，藍籌之中表現最差，安踏(02020)半日亦跌1.4%。內地經濟復甦一直不似預期，相關股份當然無運行，雖然話要靠內循環，但內剖民眾都缺錢，仲點會好似疫情前咁積極消費，個個都係慳得就慳。
生科股跟醫藥股噚日下半場無啦啦發力，又係唔知為乜咁神勇，今日即腳軟，打回原形，當中加科思(01167)與AbbVie終止合作，半日急跌18.2%；其他生科股閒閒地跌3%或以上，之前已跌到殘廢嘅藥明生物(02269)，半日跌1.3%，40元呢個位，由支持變阻力。
港股經過兩日反彈後，今日又再失20日線，暫時叫守住10日線，仲未死得晒，但逼近50及250日線已掉頭向下，可見市底有幾弱。目前險守10日線，一旦失守，萬九呢一關都係凍過水，短線支持先睇上周低位18800左右，18800都守唔住，睇怕都係再向下尋底，5月低位未必係今年低位，低處沒有最低，只有更低。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。