港股勢弱向下考驗萬九關
隔晚美股做好，美股踏入業績期，上周五高開低走，但隔晚喺Tesla跟蘋果等重磅股創新高帶動下，高開高走，三大指數向上，納指跟標指更升穿今年高位，道指升76點；標指跟納指分別升17點及131點。市場預期本月聯儲局再加息0.25%後，將停止加息，息口快將見頂，好友仍主導大市。
至於港股呢邊，當好友以為噚日打風休市，避過昨日內地公布第二季強差人意嘅經濟數據，加上有美股助力，今日港股或者能避過一跌，咁就大錯特錯。唔單止A股受壓拖低港股，港股本身就因為恒大拖足兩年後公布嘅業績，公布出嚟嘅數字當然係無眼睇兼復牌無望外，恒大嘅業績公布，令市場更清楚內房企業目前所面對嘅係一個乜嘢困局，從而更令人相信，內地經濟唔單止復甦未如預期，更加係處於水深火熱之中。如此同時，內地卻遲遲未有再推任何刺激經濟措施，究竟係無計可施，抑或阿爺仲有招可出，但至呢一刻卻未有任何動靜，中港股市難免繼續受壓。
恒指低開89點，開市價19324經已係半日高位，其後跌勢加劇，至中午休市前一度跌最多433點，見18979半日低位。中午恒指接近半日低位收市報18993，跌420點；國指跌162點，報6396；恒科指跌99點，半日報收4129；三大指數半日跌幅超過2%。半日成交額556.41億元，以近期半日成交嚟講，呢半日跌市嘅成交都唔算少。
藍籌只有三隻逆市上升，分別係半日微升5仙嘅大笨象(00005)；有Tesla業績前偷步炒上而跟隨做好嘅比亞迪(01211)，半日升0.7%，其他電動車股同樣；以及產品以出口美國為主嘅創科(00669)，由於美國經濟有望軟著陸，避過陷入衰退，創科因此逆市半日升2.5%。
本來美國息口快將見頂，對融資需求較高嘅科網股係好事，人家美股嘅納指升到唔識停，重磅科技股如蘋果等，更屢創新高。偏偏中概科技股就無呢枝歌仔唱，隔晚反映中概股表現嘅中國金龍指數逆市下跌，港股呢邊嘅ATMJB全線向下，騰訊(00700)噚日開始因為業績公布前一個月black out period停止回購，無咗回購呢一招，半日跌3.8%；至於美團(03690)跟阿里(09988)半日同樣跌逾3%，阿里90大關得而復失，股東日日期盼阿里重返紅底股，望穿秋水得個等字。京東(09618)喺內地消費下行下，股價跌4.3%，其他科網股閒閒地跌超過2%，上周重返52周高位嘅網易(09999)跌0.6%算跌得少，已經要劏雞還神。
金融股除咗大笨象，其他全線下跌，港交所(00388)半日跌近2%，友邦(01299)半日跌1.4%，其他內房及內險股全線向下，內銀股跌逾2%比比皆是，平保(02318)半日更跌3%。相對內銀及內險股，內房跟物管股跌勢更慘烈，除咗恒大交出一份嚇親人嘅業績之外，內地房地產開發投資急跌，整個板塊跌到一仆一碌，龍湖(00960)半日跌一成，碧桂園(02007)及碧桂園服務(06098)跌7.3%及7.6%，三股包辦藍籌跌幅冠亞季軍。
港股今日甫開市已失守250日線(19359)及50日線(19248)，暫時呢兩條線將由支持變阻力，而上午收市失守埋20日線(19032)，一旦連10日線(18923)亦不保，睇怕下一步要再向下尋找支持，而月初嘅低位18300至18500，將會係考驗支持嘅下個區域，未能刹車再向下穿，18000心理關口岌岌可危。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。