港股又倒水 粉飾櫥窗亦懶做
一時又話有時心理準備聯儲局收水，美股調整要搵個理由解釋，就話係聯儲局官員言論偏鷹，其實自從通脹升溫之後，鮑爺都講咗好耐要提早收水，根本市場早有準備，只係跌市同升市都要搵個理由去解釋。再加埋變種病毒令各地疫情反覆，甚至要再收緊防疫措施，美股大條道理進行調整，加上美股較年初升咗咁多，基本上無乜需要喺年結嚟粉飾櫥窗。不過港股就慘喇，第一季見頂之後，全年一浪低於一浪，較年初已水瓜打狗，無咁一截，到12月都唔整色整水，嚟個粉飾櫥窗，可見機構投資者對港股有幾失望。
恒指低開112點報23079，跌幅一度收窄至47點，見23145點半日高位後再度向下，失守二萬三關後繼續倒水，最多跌350點，見22842半日低位，再創去年5月29日以來最低水平。恒指半日跌334點，報22858；國指跌119點，報8098；恒科指再創成立以來新低，半日跌137點，報5543點。半日成交額639億，喺近日市況中唔算少，但又無至於好多，不過日日咁陰乾都係大鑊。
藍籌股普遍下跌，友邦(01299)跌1.2%；港交所(00388)跌1.9%；阿里巴巴(09988)早段係少數逆市升嘅藍籌股，但接近中午都頂唔順，要倒跌0.8%收市。科網股繼續捱沽，TMJX全部下跌，網易(09999)半日跌6.2%，跌勢顯著，京東(09618)亦失守280元呢個大支持位。信義孖寶宣布組合營，但市場對呢個計劃唔多受落，上星期五消息公布後，股價已插水，今日繼續捱沽，信義玻璃(00868)半日跌7.3%，更成為半日跌幅最大藍籌。恒安(01044)逆市升1.7%，爆冷成為半日升幅最大藍籌股，口痕友話成人紙尿褲呢期可能大賣，個市日日倒水，缸邊友嚇到瀨喎…..
Tesla近日弱勢，上周五股價更陷入技術熊區，今早電動車股全部插水，連累整條產業鏈股份下跌，比亞迪(01211)半日跌4.7%；贛鋒鋰業(01772)仲誇張，半日跌逾一成。新能源股同樣下跌，信義光能(00968)跟華潤電力(00836)半日跌逾半成。
內房股跌勢未止，佳兆業(01638)欠債未能還錢，復牌半日跳水14.1%，其他內房股先後被調低評級，整個板塊潛水嘅潛水，尋底嘅尋底，總之就無好日子過。本地本地今日亦有華置(00127)做跳水代表，私有化計劃遭否決，半日跌近三成。私有化未能通過，竟然只係十票之差，大劉一向無寶不落，令人懷疑華置係咪嫌今次私有化出價高咗，推倒重來，下次再元啦…….最慘係想借私有化甩身嘅小股東，套現機會又泡湯。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。