美國聯儲局喺香港時間本周四凌晨會有議息結果，市場預計6月唔會加息，鮑爺會後嘅議息聲明先係焦點，大家都等緊鮑爺講話，會唔會對未來息口走勢畀到啟示。港股本來就無內方向，不過人民幣離岸價再跌至六個半月低位，A股又走軟，拖累港股高開後倒跌。
恒指高開51點，開市價19440已經係半日高位，其後掉頭回落，最多跌126點見19263半日低位。恒指半日跌110點，報收19279；國指跌53點，報6535；恒科指半日跌17點，報3916。半日成交額只有401.92億元，交投繼續淡靜。
藍籌股乏善可陳，騰訊(00700)係ATMJ之中表現最好，半日逆市升0.2%，其餘美團(03690)跟阿里(09988)半日分別跌0.9%及0.6%，京東(09618)跌幅更達1.8%。比亞迪(01211)於香港嘅陳列室，今早齊遭撥紅油刑毁，暫未知發生乜嘢事，股價半日升1.3%。其他重磅股個別發展，友邦(01299)半日升0.3%，大笨象(00005)變化唔大，暫時60元呢個位都未能企定定。至於上周五創新高後嘅中石油(00857)，半日回吐0.7%，中移動(00941)跌1.5%。其實早兩個月嘅中特股熱潮好明顯已退減，呢啲炒高咗嘅中特股，可以喺高位橫行已算萬幸，有個別中特股早已打回原形，甚至跌穿起步位，中特變中凸，中伏兼嘔突。
人民幣勢弱，就算阿爺開到口話要撐內房股，但得把口叫口號係幫唔到手，人仔再跌，內房股今日又捱沽，神仙都難救，話咗內房同物管股係本身債務問題未解決前，真係好難買得落手兼坐得安安樂樂。短線參與炒作，一個唔留神好易贏變輸，都係眼看手勿動，咪手多多。
生科股及醫藥股今日表現麻麻，香港上市生物科技指數插2.5%，龍頭藥明生物(02269)半日跌3.5%；信達生物(01801)跌6.2%；維亞生物(01873)發行本金額4.7億元可轉換債券，半日更跌逾一成。
內地餐飲股低處未算低，九毛九(09922)CFO走人，股價創52周低，半日大跌14.7%；其他餐飲股閒閒地跌1%以上。
港股目前叫守咗條10日線跟20日線，理論上係有條件進一步向上挑戰250日線，可惜成交萎縮，無成交配合下，好友想進一步進攻亦有心無力。不過掉返轉頭講，無成交一樣可以挾淡倉，少咗沽盤欄路，要挾淡倉用嘅子彈亦少咗。總之家下港股彈到呢啲位，再追貨值博率有限，陰陽怪氣，難怪無乜資金肯入場追貨，只有大戶自己好淡角力，既然如此，不如隔岸觀火。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。