雖然鮑爺跟一眾行長口徑一致今年唔減息，仲要加多兩次息，但美股喺銀行股帶動下，道指升逾200點，標指亦升19點，只有納指持平，美股仍然強勢。美國唔減息仲要加，美匯高企，人民幣一度跌穿7.27水平，再創七個半月以嚟低位，令港股無法借美股強勢反彈，只係靠穩，好淡爭持。
恒指低開52點，一度跌95點，見18838，不過內地公布6月份製造業採購經理指數(PMI)略為回升至49，比上月上升0.2個百分點，大市隨A股回升，恒指一度升135點，報19070半日高位，可惜萬九未能企穩，好淡爭持。半日恒指報收18938，升4點；國指升10點，報6437；恒科指報收3908，半日跌24點。半日成交只有403.94億元，買賣兩閒，周末前夕，更少人願意入場。
其實港股再講都無乜意思，噚日期指結算都守唔到萬九大關，即使今日係半年結，亦唔見有任何粉飾櫥窗行為，好明顯係自年初由22000水平展開跌浪，基金亦心知無力挽狂瀾，粉飾櫥窗亦無乜意思。
今早雖然曾重上萬九大關，可惜又未能企穩，自恒指重返多條移動平均線之下，由上月18000低位嘅反彈浪至20000水平，可以話正式結束，問題係大市成交稀少，要沽嘅貨亦沽無可沽，但亦無人願意入場，構成目標港股唔上唔落，陰乾局面。唔少人對港股已心灰意冷，若果問阿Man港股仲有冇翻生機會，首要解決嘅係資金問題，目前外資已離場，而北水亦唔願坐定定，只係打游擊式炒作，日買日賣，除非有長線資金肯開始收集，大市減低每月波幅，咪又失驚無神先升二千再跌一千，呢啲短暫嘅放煙花挾升，只係大戶挾淡倉又或推高派貨，最後又打回原形，港股只會繼續喺有波幅，冇升幅嘅狀況下無限輪迴，談不上乜嘢入牛翻生。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。