港股愈玩愈霉 缸邊友心灰意冷
話就話港股同美股相關系數愈來愈低，但美股升跟唔，落就跟到十足十，其至跌到突，係港股近年「特色」，表現衰到無朋友，雖然太上皇口舌話唔准唱衰中港股市，但陳述事實好正常，只係港股表現唔多正常，近期好似淨係跟跌唔跟升，難怪缸邊友心灰意冷，唔使唱衰都心淡。
恒指低開79點，跌幅曾收窄至34點，見25832點半日高位，不過大市未企穩腳，沽壓又復現，盤中曾跌518點，見25348點逾三星期低位。恒指中午收報25425點，跌441點；國企指數報8984點，跌165點；恒科指低見6102點，創推出後新低，半日跌1.4%，報6141點。
藍籌股雖未至於全軍覆沒，但跌嘅多，升嘅少，唔少跌幅更超過3%，好似三桶油咁，油價回落令三桶油腳軟，中石油(00857)跌5%，中石化(00386)亦跌3.6%，中海油(00883)跌超過1%都還得神落。萬洲(00288)父子不和，家不和萬事不興，噚日急跌一成後，今日再唔見多3.5%。中生製藥(01177)發盈喜，於下子公司撈埋疫苗嗰瓣有得執，中期可多賺五倍，半日升近3%。噚日李寧(02331)食咗春藥咁急升，今日輪到安踏(02020)發力，雖然半日只係升2.2%，但逆市向上已難能可貴。
騰訊(00700)出完業績無驚亦無喜，業績都叫符合預期，問題係喺監管陰霾下，未來增長定必有影響，股價高低走，半日倒跌1%，都預咗450阻力唔易過，果然半日高位就係450.8元，留意430元再失守，下一站400大關走唔甩。商務部尋日就《直播電子商務平台管理與服務規範》行業標準公開徵求意見，另外，交通運輸部正研究制定維護網約車駕駛員權益相關政策文件，總之監管風暴停不了，日日有新花款，科網平台股日日無安寧。快手(01024)落地獄係意料中事，但地獄有幾多層真係無人知，股價跌咗三個月仍未搵到個底，今日王再創上市新低，半日又跌2.5%。其他平台股閒閒地跌2%以上，阿里(09988)亦創香港上市後新低，半日跌3.8%，失守180元之後，無底深潭咁款，高位重注又唔識止蝕，阿Man見到估值已平到跌渣嘅阿里，都只能講句愛莫能助。
電動車股今日有資金流入，整條產業鏈相關股份逆市做好，板塊中股份普遍錄得2%升幅，奇怪係中升控股(00881)斯人獨憔悴，半日跟隨大市下跌，相反另一4S車股和諧汽車(03836)半日升3.3%，似乎現水平係收集中升好機會，呢啲位買，穿65元止蝕，博佢上返70樓上企穩，再挑戰前高位75元水平。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。