港股成交萎縮 缸邊友無心戀戰
美股先升後跌，早段道指一度升逾300點，但高開低走，至收市倒跌215點收市，標指跟納指均於早段升抵阻力後無法再突破而掉頭，收市分別倒跌32點及92點。美股仍然陷入日升日跌嘅格局之中，甚至已演變到半日升半日跌嘅狀況之中，典型熊市走勢。喺一個熊市之中，跌幅唔會令人輸死，但反反覆覆嘅波幅最折磨，亦會不斷消耗市場購買力，令入市資金減少，目前美股開始出現成交縮減嘅問題。其實港股又何嘗唔係成交萎縮，今日半日成交縮到只有448.11億元，500億都無，唔知仲以為明日假期。
港股經過上周連跌五日後，噚日嚟個鯉魚翻身，升返幾百點，今日又跌美股下跌而低開，恒指低開126點，其後跌幅曾收窄至95點，見20751半日高位，喺A股回軟下，港股亦跟隨下跌，半日最多跌281點，見20564半日低位。中午恒指報收20605，跌240點；國指報收7079，跌88點；恒科指則跌75點，報4499。
藍籌股普遍下跌，不過石油股喺油價反彈下企穩，航運股東方海外(00316)持續反彈，半日升2.7%，成為表現最好藍籌股。藥明生物(02269)發盈喜，高開80元剛好係短期阻力位，一開就回頭，半日升幅收窄至只有1.3%。其他生化藥股表現麻麻，香港上市生物科技指數半日跌1.7%，可見呢個板塊表現仍反覆，而股份一反彈，都係引嚟沽盤趁機走人。
科技股今日開市仲頂得一兩下頭鎚，但未幾已跟隨大市回落，當中阿里(09988)半日跌3%，又逼近100元大關，睇樣似乎想力保紅底股身份，暫時睇100大關守唔守到。其他科網股又唔係跌好多，但現水平無資金入場下，想升又無乜本事。
美國經濟講緊有機會陷入衰退，大型企業頻傳裁員消息，就算唔裁員都請少啲人，蘋果計劃明年放緩招聘及支出增長，手設股今早向上，其實呢個板塊近日屢見大行下調評級及目標價，睇嚟一段時間係有波幅，冇升幅。
雖然阿爺高度關注內地斷供事件，亦囑咐銀行對斷供業主抱較寛容態度，並協助停供項目盡快復工，但標普預測，如果無法再融資，其評核嘅中國發展商至少已經有五分之一可能陷入資不抵債境況，而事實上喺標普評級之下，唔少內房債券早已跌至垃圾級別。內房股跟物管股反彈一日後，今日又回復弱勢，睇嚟內房債務問題一日未明朗化，內房跟物管股都難有運行。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。