港股成交薄弱 大戶輕易舞高弄低
美股連跌三個交易日，美股三大指數跌1%或以上，隔晚夜期跟ADR死死下，港股今早列口低開，但中國公布月製造業PMI好過預期，今早恒指低開後，一步步收復失地，雖然上半場仍收制於20日線(19901)，但喺無乜特別利淡消息下，大戶要舞高弄低個市易如反掌，家陣上上落落都唔使點有個理由。
恒指低開359點，開市再插落去19564半日低位，跌384點，但內地公布PMI好過預期，大市跌幅顯著收窄至42點，見半日高位19906，但10日線未能企穩，始終A股都係插緊水。半日恒指半日跌78點，報19871；國指跌0.1%，報6832；恒科指一度跌逾2%，低見4123，但半日倒升0.8%，收4260。半日成交額545.07億元，繼續靜靜局局，正因為成交薄弱，大戶要做嘢係隨心所欲。
藍籌股普遍向下，不過美團(03690)就先低後高，半日倒升2.5%，騰訊(00700)亦唔執輸，半日跟京東(09618)齊齊倒升，三股叫做撐起個指數，即管睇睇下半場能否再下一城。不過內銀股表現就麻麻，工行(01398)跟建行(00939)雙雙公布業績，咁啱得咁橋，兩間內銀半年都係賺多5%，不過四大國有銀行無獨有偶，年年份業績都係共同進退，大家都習以為常，不過股價就跟隨大市下跌，半日分別跌0.5%及0.6%。其他藍籌股都係跟個市咁上下，半日跌幅畀早段大大收窄，咁嘅走勢，下半場隨時轉埋燈。
比亞迪(01211)雖然交出一份唔錯嘅業績，但股神巴菲特一樣無面畀，喺8月24日減持咗超過一球股份，股價一度低見229元，但半日跌幅收窄至不足一成。股神沽貨隨時只係個開始，雖然減咗球幾貨，但手上仍持有逾二億股，要全數減持，呢條數都有排計，睇嚟未來一段日子，比亞迪可能跟騰訊一樣，喺主要股東減持陰影下，只會有波幅，冇升幅。比亞迪急跌拖累到整個汽車板塊下跌，不過跌幅當然無比亞迪咁甘，普遍跌幅都係4%以內，蔚來(09866)更逆市升2.8%。
港股升跌依家真係唔使理由，尤其成交薄弱，買賣兩閒下，大戶要操控指數上落易過借火，暫時短線波幅係19200至20200點，呢一千點上上落落都夠玩。至於個股就真係無乜信心坐定定，都係高沽低買短線操作為主，咁嘅成交，好明顯係塘水滾塘魚，邊有大型基金肯入場陪你坐貨。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。