港股成功突破下降軌可更上一層樓
美國就業市場表現平穩，美國加息壓力可緩解，喺下周聯儲局議息前，市場氣氛回緩，隔晚美股終止日前跌勢回升，三大指數向上，帶動港股今早反覆向好。內地優化防疫政策，市場憧憬內地短期內通關，加上內地通脹持續回落，有望放鬆銀根，A股轉跌為升。港股今早再挑戰高位。
恒指高開34點，一度升逾200點，其後倒跌45點，見19404半日低位，但A股跌幅收窄更轉跌為升，港股回勇，一度升355點，見19805，為9月1日以後高位，其後升幅略為回順。中午恒指升319點，報收19769；國指升112點，半日報收6778；恒科指半日升60點，報收4330。半日成交額958.57億元，以周末前夕嚟講，今日成交都算幾暢旺，而呢幾日全日成交保持到喺1500億樓上，可見市場資金甚為充裕。
藍籌股整體向好，友邦(01299)半日升2.3%；港交所(00388)亦升2.5%，大笨象(00005)喺呢一轉升浪相當落後，到目前為止都未能重上50元水平，叫股東情何以堪，半日升幅連1%都冇，認真失禮。悶納咗一段時間嘅納指，隔晚有返啲起色，加上反映中概股嘅金龍指數繼續走強，港股呢邊嘅科網股亦做好，騰訊(00700)半日升1.6%；美團(03690)半日升2.2%；京東(09618)升2.5%；阿里巴巴(09988)重上90元水平，半日升3.1%。至於呆滯咗一段時間嘅內銀股，今日開始發力，內地傳建議保險企業承接銀行沽出債券，整個板塊向上，只係升幅好有限，只有招行(03968)跟郵儲行(01658)升4%，表現較突出，其他內銀股升幅都係1%左右，落後得緊要，渣住呢啲股收息，但股價就落後大盤幾條街。
內房股跟物管股今日又落鑊，下周內地召開中央經濟工作會議，市場憧憬更多扶持內房嘅政策推出，包括淡化住房不炒，同時有報道指中國監管部門將研究擴大REITs試點範圍。睇返內房股嘅表現，本身底子愈差嘅民企內房，半日升得愈勁，閒閒地升一成過外。雅居樂(03383)再減持雅生活(03319)套現，雅居樂升11%，雅生活雖然早段則曾跌7%，半日轉升0.2%。
線上醫療股炒咗個幾星期，今日卒之回落抖抖，阿里健康(00241)逆市跌4.5%，為表現最差藍籌；平安好醫生(01833)下滑1.7%；京東健康(06618)降2.1%。不過相對呢兩星期呢個板塊嘅累積升幅，呢個回吐幅度濕濕碎。
港股已成功突破下降軌，萬九水平亦企穩，暫時大市要挑戰20000應無乜難度，只係20000水平係咪咁易企穩就係另一回事。阿Man一直對大市審慎地樂觀，只係現水平追貨值博率大減，寧願等回吐再收集。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。