港股技術走勢雖好轉 暫無重大利好消息再刺激
美股隔晚個別發展，港股噚日升穿條50日線後，今日再下一城，恒指半日一度升近400點，唔知有乜好消息，個市又要升多幾嚿嚟慶祝…….恒指高開61點後，曾略略回落至25458點半日低位，其後升幅擴大，喺無乜利好消息嘅情況下，恒指最多升398點，見25808點半日高位回吐。恒指半日報收25708點，升298點；國指則升126點，半日報收9097點，重越9000水平；恒科指跑贏大市升逾2%，報收6466點，升142點。留意半日成交只有664億元，成交唔多配合升勢，挾淡倉意味甚濃。事實上，貼價熊證由25400至25800嘅街貨，今日已一口氣殺清光，大市喺無重大利好消息下，暫時又要等啲熊仔養返肥啲，先有再挾淡倉嘅理由。
不過港股已企穩喺25000關之上，呢兩日仲順利收復埋50日線(25393)，技術走勢上確係有所改善。而一眾科網股暫時拋低監管風暴嘅加鎖，帶動大市回勇。只係美債息上升趨勢持續，市場甚至聯儲局亦開始意識到通脹並非短暫現象，一旦聯儲局加快收水步伐，對環球股市始終有威脅。除非港股有重大利好消息配合，否則要挑戰100日線(26700)又談何容易。
為咗挾爆淡倉，藍籌股大部份向上出番分力，大笨象(00005)威咗幾日要抖氣，今日輪到另一重磅金融股友邦(01299)接力，半日升2.7%。內銀股同內險股亦有不俗表現，內銀股普遍升1%以上，兩隻藍籌內險股半日齊齊升逾2%。申洲(02313)有大行調高目標價，半日升近5%，為表現最好藍籌股；至於龍湖(00960)跟其他內房股，仍受恒大(03333)債務問題影響唔多精神，半日逆市跌2.1%，為表現最差藍籌股。除咗內房股持續疲弱之外，物管股亦受壓，整個板塊逆市下跌，跌幅至少1%或以上，睇嚟恒大事件一日未解決，缸邊友對內房同物管股都難以重拾信心。
噚日同大家提過，因為動力煤價爆升關係，拖累電力股急跌，但連新能源股如風電都要跌，阿Man就覺得無厘頭，但就叫大家可以趁機吸納龍源電力(00916)呢啲非火電股，今日風電股果然特別醒神，升返唔少，而阿Man至愛嘅龍源電力，半日升近一成，噚日下半場16元水平畀晒位上車，短短一日就即有一成利潤，對大家有晒交代。
今日暫時無乜心水，不過阿里(09988)旗下天貓今晚開始雙十一購物節嘅銷售推廣活動，提醒咗阿Man，係時候睇返啲雙十一概念相關股份，咁阿里當係雙十一購物節始祖，不過阿里180元樓下蟹貨真係同依家大閘蟹一樣咁當造，如果要揀炒雙十一概念，都係睇返重磅科網股之中，唯一已經收復所有移動平均線嘅京東(09618)穩陣。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。