港股持續疲弱 行一步褪三步難搞
美國投資者等緊鮑爺喺Jackson Hole發表講話，預測一下聯儲局嘅收水路線圖之際，美股保持喺高位運行，標指跟納指再創新高。至於港股真係弱過藥煲，彈完一日就無影，噚日高開低走已知形勢不妙，今日又遇上A股受壓，港股趺勢再現。
恒指低開20點，報25673，早段曾倒升12點，見25706點半日高位，但不過A股愈跌愈深，港股掉頭向下，一度跌391點，見25302半日低位。半日恒指收市跌369點，報25324；國指中午跌8915，跌160點；恒科指彈完三日，又回復弱勢，半日跌2.4%，報6303點。不幸中嘅大幸係半日大市半日成交只有763.8億元，又唔算好大成交。
藍籌股幾乎全部下跌，只有蒙牛(02319)中期業績交出亮麗成績表，半年多賺1.4倍，盤中一度升至47水平，但喺大市受壓下，升勢回順，半日升幅縮到2.5%，但已經係藍籌之中表現最好。ATMX又跌過，阿里(09988)、騰訊(00700)跟美團(03690)齊齊跌逾1%，阿Man話咗科網股只係反彈，暫仍未擺脫弱勢，但最唔明係小米(01810)，明明公布中期業績表現強勁，但高開後股價未能企穩26已掉頭，半日股更跌3.7%；口痕友話唔知係咪之前有傳聞小米或收購恒大汽車(00708)，好人好姐搭上債務問題公司，又難怪市場擔心，先沽而後快。同系金山軟件(03888)更慘情，半日再跌近6%，業績公布後跌咗兩成幾三成。
其實金山軟件表面業績倒退98%，係因為舊年有分拆金山雲條數，今年無咗呢筆一次性收益，減返呢條數，業績實際只係倒退28%。不過遊戲業務收入減咗，投資者擔心佢嘅現金流減少，加上公司講到明唔會回購，令股價失去支持。不過阿Man都真係唔明公司仲係賺錢，乜事要跌到咁，不過噚日跌咗兩成都唔識彈，今日若然再穿埋上月低位，睇嚟仲有機會向下尋底，暫時咪多手接飛刀。其他科網股全線向下，快手(01024)中期虧損擴大，股價持續弱勢，半日再跌近一成。生化科技股同樣走軟，大部份股份半日跌逾5%，人哋美國嘅疫苗股炒到出煙，港股呢邊嘅生化科技股浮浮沉沉，呢啲情況只能夠搵位炒上落。阿Man都係主力吼位藥明生物(02269)，不過暫時唔出手住，落到113補返星期二個裂口先考慮。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。