市況仍兇險 8月步步為營
8月2日，短暫時間有陽光，有幾陣驟雨，天氣炎熱。美股上周五回軟，三大指數齊跌，道指跌149點；標指跟納指則分別跌23點及105點。變種病毒繼續肆虐全球，美國確診病例暴增，有分析指一旦美國再實施封城，將引發市場恐慌，導致美股出現嚴重調整，呼籲投資者家下好沽貨套現，鎖定利潤。
美股高處不勝寒，港股則未見瘋狂先回落，7月港股顯著回落5.4%，創逾兩年以嚟最大單月幅，一個月累計跌2866點，亦係近6年以嚟表現最差，暫時恒指喺26000水平反覆。喺監管風暴下，多個板塊被波及，教育股成重災區，科網股亦為重創，市場對國策已成驚弓之鳥。雖然阿爺已出招救市，中央部委曾約談投行高層，試圖釋出「監管措施只針對教育行業」嘅訊息，而個別投行的嘅分析員亦指「極端措施未必蔓延至其他行業」。中證監亦表示未有阻止中概股往美國上市。阿爺一邊解畫救火，但美國嗰邊就話暫時接受中概股上市申請。
惟整體中概股被重擊得遍體鱗傷，單計7月，中概股市值累計蒸發4070億美元(約3.17萬億港元)，為去年3月美股暴跌時期兩倍多。投資者傾向相信，唔同行業本身亦要面對唔同程度嘅整改，港股則面對中外資金大舉撤離，資金離開後，短期未必重返市場，要市場重拾信心，似乎需要一段時間。
不過阿爺出手維穩，令大市開始喘定，預期監管步伐會有所放緩，可惜投資者信心仍未回復，恒指反彈至27000水平左右將再遇壓力，難以輕易收復250日線。估計8月頭段，港股將於25000至27000水平整固，最擔心係一旦疫情擴散，又或監管再度收緊，以及中美關係惡化，通通都係掟貨嘅利淡藉口，港股一旦再跌穿上月底部24800水平，下站將見24000點，失守將進一步下試23000至23500點。
留意本月為港股傳統中期業績公布期，一眾公布業績嘅重磅股，係見光死定係見光起，將會決定後市去向，但恒指一日未收復250日線，約27200水平企穩，後市未宜太過樂觀。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。