港股瓜多過菜繼續向下尋底
上周美股表現強差人意，市場憂慮聯儲局大幅加息，加上憂慮經濟陷入衰退，上周美股三大指數下跌，道指跟標指累計跌逾4%，納指跌幅更逾半成。港股喺ADR跟黑期表現持續疲弱，今日大市再度走軟，恒指四星期累跌逾2200點後，跌逾一成後，今早曾再跌逾200點。
恒指低開151點，最多跌192點，見17740半日低位，創2011年11月21日以嚟，即11年新低，其後內地股市回穩，港股倒升，最多升144點，見18077半日高位，不過萬八仍然未企得穩。恒指半日升30點，報17964；國指半日倒升69點，報6184；恒科指半日升85點，報3675。半日成交額539.23億元，恒指時光倒流11年，都未見大量資金入場買貨，可見市場信心薄弱到一個乜嘢地步。
藍籌股個別發展，重磅科技股叫威猛少少，騰訊(00700)跟美團(03690)半日升逾4%，京東(09618)半日升逾2%，阿里(09988)半日升不足1%，暫時連80水平都企唔返上去。內房股亦見反彈，不過力度有限，以累計跌幅計算，內房嘅反彈幅度，只係杯水車薪。藥明生物(02269)表示最多斥資3億美元回購股份，股價半日彈5.5%。上周油價累計跌逾7%，三桶油今日顯著下跌，中石油(00857)半日跌4.4%，係表現最差藍籌股。
英鎊急創創多年新低，喺英國減稅方案宣布後，英鎊兌美元貶值至有史以嚟低位，喺英國有大量資產嘅大笨象(00005)、渣打(02888)半日分別跌8%及7.4%。長實(01113)跟長和(00001)分別跌半成及一成。
澳門預計11月恢復內地旅行團赴澳旅遊，加上大行唱好，濠賭股全線向上，金沙中國(01928)半日升近兩成，創半年高位。其他濠賭股閒閒地升接近一成。除咗濠賭股，內地消費股、出行股及餐飲股有資金追捧，主要係睇好「十.一」黃金周消費。不過唔係阿Man想撥冷水，內地仍然嚴格執行清零政策，一旦疫情反覆，確診數字略為回升，又封呢度，封嗰度，小心呢類股份炒作相當短癮，忍手切忌高追。
香港雖然今日起略為放鬆入境檢疫要求，但0+3能否吸引旅客到訪，阿Man就唔係太樂觀，反而係方便咗港人外遊，尤其呢幾年港人因為抗疫已久未出行，難得回港後唔需要再酒店隔離，相信唔少港人已安排好出行旅遊，反而對本港零售及飲食業唔係好事。再加上美匯升到唔識停，資金外流壓力更大，港股暫時都係易跌難升，3月低位18200失守後，睇嚟會由之前嘅支持變為阻力，港股只有繼續向下尋底。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。