港股積弱 科網股繼續無運行
無啦啦又重提收水，明明早兩晚聯儲局議息時，提早縮減買債，市場早就心中有數，隔晚又用收水呢個藉口隊美股，道指曾升262點後收市倒跌，納指更跌逾2%，拖累今早亞洲股市受壓，港股維持弱勢，科技股沽壓較大，恒科指半日一度跌2.7%，再創指數成立後低位。
恒指低開11點，見23463點已經係半日高位，科網股沽壓沉重，港股愈跌愈多，盤中最多跌308點，見23166。中午收市接近半日低位報23175，跌300點；國指跌147點，報8208；恒科指跌153點，報5668點。
藍籌股普遍下跌，米字旗國英倫銀行突然宣布加息，大笨象(00005)逆市升2.3%，升幅係藍籌之中最多。信義孖寶出咗消息設立合營進軍多晶硅產業，不過市場唔多受落，信義光能(00968)半日跌近一成，信義玻璃(00868)半日跌半成。體品股威一日，跌兩日，今日安踏(02020)跟李寧(02331)半日分別跌5.4%及4.7%。
重磅科技股係拖低大市嘅兇手，講咗好耐ATMX一段時間無運行，估唔到隻J仔京東(09618)都話畀人的咗去照肺，股價半日跌4.1%，收市穿埋280元真係無眼睇。加埋騰訊(00700)、阿里巴巴(09988)、美團(03690)，半日分別跌3.2%、3.8%及5%，ATMJ四股貢獻咗230點恒指跌幅。嗶喱嗶喱(09626)創港上市低，中午插5.2%；百度(09888)降1.4%；快手(01024)挫4.1%。小米(01810)今日算係咁，守咗18元大支持位後，半日逆市微升0.2%。呢個板塊係監管陰霾揮之不去下，有排無運行。
阿Man愛股之一嘅生科股龍頭藥明生物(02269)，前日午後一個制裁傳聞，股價倒水咁倒咗25%，阿Man喺另一平台嘅收費聊天室，帶領住會員低位撈貨，兩日即贏超過一成，今日成功喺95元阻力之前順利食糊落車。美國商務部新增嘅制裁名單只涉及軍事科學，未有生物科技企業，生物科技股開市抽高，不過大部份畀大市拖低，升幅收窄，部份更倒跌，金斯瑞(01548)倒跌0.6%；信達生物(01801)更插6.1%；康方(09926)瀉7%；泰格醫藥(03347)挫5.3%。
鋼鐵股有資金流入，周初阿Man喺3元邊建議會員上車馬鋼(00323)，半日升4.6%，又可以食糊。唔好睇少呢幾個子嘅利潤，家陣港股搵食艱難，雞糊都要食，密食當三番，應付呢啲市況，短炒打游擊，積少成多，只有咁先可以安然過渡。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。