港股窄幅波動無方向
美股隔晚就業數據好過預期，聯儲局有官員出嚟放鷹。美股早段腳軟一下，其後慢慢回升，三指數均倒升收市。美股暫時仍然喺高位整固，暫時消息層面上，無乜消息令個市大升或大跌，業績期已接近尾聲，資金從重磅股開始轉向炒股仔，炒到呢批股仔，又要留意音樂椅遊戲幾時音樂會停落嚟。不過美匯強返啲，人民幣自然走弱，但港股低開後又死唔去，恒指跌過百點後倒升，暫時受制10日線(19932)。
恒指低開107點，見19656已屬今早低位，其後止跌回升，一度升134點，見19898半日高位，但未能突破10線。恒指半日升89點，報19852；國指升52點，報6752；科指升32點，報4225。半日成交額437.48億元，交投繼續呆滯，加上周末前夕，更加係敵不動，我不動。
藍籌股個別發展，大笨象(00005)半日跌0.2%，都係吽吽逗逗，呢期啲人講得最多關係滙控嘅，係總行前面行嚟行去嘅廣告車，除咗呢樣嘢，大笨象都無乜嘢好講。內地缺電情況再受關注，未知係咪會影響埋電動車銷量，比亞迪(01211)半日跌2.3%，穿咗280元近日支持位。中石油(00857)傳聞指考慮分拆油品銷售業務上市，股價半日升2.4%。至於ATMJ半日表現唔錯，全部都向上，而騰訊(00700)跟阿里(09988)分別升1.9%及2%，為恒指貢獻超過50點，佔去大部份恒指嘅升幅。
不過阿Man諗極唔明係為乜缺電要炒電力股，呢個邏輯真係畀佢考起，但偏偏電力股強咗幾日，今日升勢持續，只可以話資金流入呢個板塊未肯走，電力股無論係傳統電力股，抑或新能源股，半日均見進帳，升幅由超過1.4%至接近7%不等。至於跟電力股息息相關嘅煤炭股，喺內地動力煤期貨走高下，呢個板塊亦異動上升，不過升幅都係1.8%至3.5%，跟返動力煤期貨3%升幅。
其他股份無乜睇頭，今日生科股表現較弱，板塊逆市下跌，藥明生物(02269)半日企5.2%，藍籌之中跑第尾。早兩日都講咗藥明生物70元企唔得穩，都好難更上一層樓，暫時受制多條移動平均線，而100日線喺66.5水平，此關不容有失，有貨自己要岌實。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。