港股縱反彈 暫未脫反覆偏軟局勢
市場等待美國通脹數據，而10年期美債率回升，隔晚美股道指及標指再創收市新高。不過港股總係慢半拍，今早都係低開，不過見A股做得唔錯，港股低開高走。恒指低開113點報26491，半日最多跌151點，見26454點半日低位。其後止跌回升，恒指重上20日線(26642)，倒升216點，見26822點半日高位，兼創7月26日以嚟高位。只係ATMX跟大市走勢相反，先升後回，拖累大市升跌收窄。半日恒指報收26661點，升55點；國指升53點，報9552點；恒科指升2點，半日報收6833點。
藍籌股個別發展，油價反彈，三桶油做好，中石油(00857)升3.4%；中石化(00386)跟中海油(0083)齊升1.6%。兩重磅金融股大笨象(00005)跟友邦(01299)分別升0.2%及0.6%。ATMX今日唔多醒神，以為小米(01810)有舵手雷軍演講會，或會對市場帶嚟驚喜，點知演講會內容都係咁上下，小米始終過唔到28元阻力，今日見過27.9就行人止步，半日倒跌0.7%。騰訊(00700)、美團(03690)跟阿里(09988)半日分別趺0.9%、0.3%及1.3%。阿Man講過喺監管風暴陰霾下，科網股都係有波幅，冇升幅，千祈唔好見呢個板塊嘅股份一日就心思思追貨，否則好易又坐艇。
之前內房股一直受恒大事件影響，唔少大大小小嘅內房股跟物管股齊遭洗倉，不過有消息指恒大(03333)或將恒大物業(06666)股權售予萬科(02202)財團，市場憧憬恒大事件有望解決，內房跟物管股反彈。不過阿爺政策唔鼓勵炒房，為遏止樓價上升，及減輕人民置房負擔，內房股想再好似以前咁好賺已有難度，暫時呢個板塊都係反彈，反而有貨好趁反彈減持。
至於物管股本來一直跑贏內房股，但阿爺同樣要出手規管，上月底唔少物管股急跌，股價走勢已內傷，加上本來物管股本來估值就唔平，上月底急插，依家反彈都係去返合理水平，暫時又唔係特別抵買，由於政策風險考慮，物管股已經難再好似之前享有咁高估值。
新能源股輪流炒，今日輪到炒風電股，尤其中小型風電股。每當炒到板塊內三四線股份嘅時候，整個板塊都係時候抖抖，急升嘅當然唔好高追，反而可以搵返板塊內嘅龍頭，趁調整收集。低買高沽短線操作，仍然係目前最好嘅策略，審慎保守又好過太進取，總之港股目前只係反彈，留意指數去到26800至27200阻力相當大，要大市重返27200之上，港股先可以扭轉目前反覆偏軟局勢。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。