港股缺成交配合難突圍
市場已完全消化變種病毒Omicron對經濟復甦帶嚟嘅影響，事實上，暫時亦見唔到Omicron有好大殺傷力，市場對於疫情反覆漸釋懷，美股呢個星期從新出發。美股三大指數連續顯著上升兩個交易日，納指隔晚升幅更超過3%，主要係中概 股跟科網股反彈，市場對中概股退市憂慮亦有所減退。至於港股喺人行突然宣布降準後，市場氣氛略有改善，加埋中概股退市擔憂略減，港股噚日反彈逾600點，夜期更重返二萬四關，今日早段升勢持續，可惜二萬四關得而復失，大市升勢不保。
恒指高開106點報24090，最多曾升114點，見24097半日高位，不過睇成交都知港股仍然缺水，喺缺乏買盤跟進下，大市升勢不保，恒指倒跌76點，見23907半日低位，不過10日線似有支持，大市喺24000附近拉鋸。恒指半日收市跌28點，報23954；國企指數報8510，跌16點；恒科指微跌不足1點，報5968點。半日成交額只有672.03億元，咁嘅成交量，個市想發圍都難。
藍籌股個別發展，港交所(00388)威咗兩日，今日回返0.5%，都仍然企到470元。金融股普遍都回少少，跌幅少過1%，只有友邦(01299)跟平保(02318)半日分升0.7%及0.3%。噚日最叻嘅兩隻藍籌，今日都要回吐，碧服(06098)只係回0.9%，而阿里(09988)就由天堂跌落地獄，今日急回超過半成，藍籌之中表現最差。體品股靜咗一排，今日發力，李寧(02331)半日升5.2%，安踏(02020)亦升2%。
生科股繼續做好，話咗藥明生物(02269)急跌唔買就笨，周一急跌逾7%，逼到落95元附近，真係唔買就笨，今日再彈6.2%，連續兩日彈返接近一成，咁又搞掂食碗麵。至於國指新貴信達(01801)係噚日阿Man嘅心水，半日升1.4%。其他生科股普遍彈4.7%至一成不等。
電力股今日亦有唔錯表現，奇怪係具備火電業務嘅半傳統電力股表現好過新能源股，而阿Man一直睇好嘅龍源電力(00916)，全風電業務本來應該最殺食，偏偏半日升係升2.1%，暫時都仲未企穩喺16元樓上。其他電力股半日升逾1%至最勁嘅華能(00902)半日彈咗8.4%。
港股暫時仍未能重上二萬四關企穩，暫時都需要啲時間，港股要更上一層樓，似乎目前最缺乏嘅係成交配合，喺缺水呢個問題下，港股要突圍始終有難度。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。