港股缺水偏弱難搵食
美股已連跌四個交易日，聯儲局官員繼續放鷹，再加埋上周五鮑爺喺Jackson Hole年會咁大盤冷水淋落市場，講明為咗控制通脹，一定要受苦，咁美股嘅投資者過度興奮嘅情緒就即時冷卻，呢幾日資金開始由risk on 轉去risk off 。除咗美股弱勢，內地公布中國8月財新製造業PMI再陷收縮，港股喺9月首個交易日維持弱勢，半日跌逾300點。
恒指低開192點，不過A股止跌回升，港股跌幅亦收窄至114點，曾見19839半日高位，但仍受制20 日線(19879)，喺沽壓再現下，A股半場收市後，恒指跌幅再次擴大，半日最多跌339點，見19614低位。半日恒指報收19650，跌303點，10日線(19791)亦失守；國指半日跌91點，報收6773；恒科指半日跌49點，報收4424。半日成交額577.73億元，今日無咗MSCI rebalancing，全日成交可能又縮返落去千億樓下，噚日超過1300億兼喺19500水平回升，唔多唔少會呃到吓人，以為個市有成交配合回升。
藍籌股偏軟，大笨象(00005)跟友邦(01299)分別跌1%及1.3%，內銀股公布完業績都無乜起色，工行(01398)跟建行(00939)半日跌逾1%。港交所(00388)重回320元水平之下，中美雙方初步達成審計協議，中概股唔使急急腳回流港股上市，港交所見財化水，加上估值又貴過人，股價走弱好正常。比亞迪(01211)爆出股神減持後，股價噚日急挫，雖然收市守咗240元支持，無奈見到股神仲有二億幾股喺手，減多一成講緊二千萬股，今日個市又腳軟，比亞迪再度走軟都常。
英國《金融時報》報道，騰訊(00700)計劃今年出售約1000億元人民幣股票的軟性目標，以紓緩投資者跟反壟斷的壓力。而涉及減持嘅股份包括美團(03690)等，股價半日逆市升0.3%，但美團有機會被減持，股價半日跌逾4%，騰訊就算用返上次派送京東(09618)嘅方法嚟減持美團，唔喺市場直接沽貨，對美團嚟講都係一個威脅，短期將為美團股價帶嚟壓力。
雖然通脹仍然高企，但阿Man早喺幾個月前講過，喺全球多哋回復正常通關後，航運價格將會見頂回落，下半年航運價預期要向下，而波羅的海乾散貨指數(BDI)上月大跌49.1%，航運股遭拋售。話咗呢個板塊早早見咗頂，今日整個板塊嘅股份全線插水，跌幅閒閒地4%以上。
港股都係弱底，但暫時又未見淡友再大大力向下質，只係好友無乜力還擊，恒指暫時喺19200至20200點之間上落，其實港股一直都缺水，基本上易跌難升，正股難炒，唯有炒指數搵食，只不過喺成交低迷深度不足下，大戶繼續將指數舞高弄低，炒指數亦難掌握，若然未能睇通睇透，倒不如靠邊站食下花生。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。