港股若再失全部平均線將繼續向下尋底
喺美國公布CPI前夕，美股隔晚走軟，不過科網股氣氛較差，主要係軟銀有份投資嘅WeWork表示「嚴重懷疑」能否繼續經營，股價大跌38%，孫正義呢項投資又撞山，軟銀喺過去幾年大量投資呢類燒錢公司，結果，軟銀呢兩年要大量沽貨套現先捱得住。納指隔晚跌162點，道指跟標指分別跌191點及31點，標指留意4400-4450支持守唔守得住。暫時VIX仍然喺危險水平之下，但要留意一旦升穿17，美股走勢可能逆轉。
至於港股噚日低位回升收市，中概股隔晚借勢反彈，但大部份股份高開低走，甚至倒跌收市。美股收市後，拜登簽署制美資對華的敏感技術投資，包括香港及澳門。呢個制裁消息難免令港股低開，不過中國一向要面子，你制裁我，我就反制裁你個制裁，無實際出招都要打嘴炮回應，唔排除今日港股又上演中外大戰，外資沽，中資力托，港股未必會因為制裁竹呢個消息而大跌，跌少過二百點都算係頂得吓。
恒指低開121點，一開市已失50日線(19208)，雖然跌幅曾收窄至47點，見過半日高位19198，但始終畀條50日線壓住，再度擴大跌幅至最多215點，見19030半日低位，叫做險守萬九心理關口。半日恒指跌183點，報收19062；國指跌63點，報收6550；恒科指報收4308，跌65點。半日成交額只有430.73億元，由高位20300點跌咗逾千點落嚟，仍未見有資金肯入場趁低吸納，至令成交持續低迷。
藍籌股普遍偏軟，大笨象(00005)今日除淨，股價則跌0.8%，呢幾日先入場博財兼收嘅缸邊友，未能如願以償。港交所(00388)半日跌0.5%，但仍守住條20日線，相對大市算硬淨；至於友邦(01299)半日逆市升1.8%，金融股中表現最好。但內銀跟內險股下跌，之前有傳言指內地出現大量斷供房，但深圳金融監管部門澄清嚴重不符，可惜未必為內銀股護航，內銀股走軟。而內地水災或引發大量理賠，內險股近日亦走弱。ATMJB跟返隔晚中概股走勢，今日全線向下，阿里(09988)將於收市後公布業績，股價績前跌1.7%，其他科網股普遍跌1%以上，只有騰訊(00700)跌0.2%，叫做跌得少。創科(00699)公布上半年少賺18%，半日股價急跌18.2%，一隻藍籌股可以半日跌近兩成，你話家下恒指有乜辧法唔成日玩過山車。
高盛稱澳洲液化天然氣開發項目罷工，或令液化天然氣(LNG)供應大幅減少，電廠可能增加煤炭用量，本港相關石油股跟煤炭股逆市做好。另一個逆市做好嘅板塊係內地電訊股，聯通(00762)公布中期賺124億人民幣，派息亦增23%，半日升3.3%，藍籌之中表現最好；今日派成績表嘅中移動(00941)，半日升0.9%；只有中電信(00728)跌0.8%，表現較為失色。
內房股負面消息不絕，繼碧桂園(02007)爆雷，或成為恒大2.0後，今日輪到富力(02777)表示因資金緊張，導致商票逾期，股價半日跌7.6%；其他內房股閒閒地跌2%至超過半成。話咗內房股不能沾手，即使偶有反彈亦唔好貪小便宜，好容易因小失大。隔晚美國公布7月份CPI，升幅少於預期，美股全面高開，三大指數升逾1%，不過有聯儲局委員指CPI雖然偏向溫和，但仍支持加息去繼續壓抑通脹，重申通脹目標係2%。美股應聲由高位回落，但三大指數維持上升，道指升52點，標指僅升1點，納指升幅亦縮水至不足16點。雖然標指已逼近4450首個支持，幸好VIX未見急升，維持喺17樓下，收報15.85，仍然安全，市場未見恐慌，只係美股現價估值已經唔平，就算暫時未見較大幅調回調，都只會喺現水平橫行。
至於港股隔晚喺夜期跟ADR時段一度威過，主要係阿里(09988)交出一份好過預期嘅業績，帶動夜期一度重上19500水平，可惜未有企穩，並再度回落至19300水平，即250日線(19286點)附近。港股噚日彈到去250日線前亦止步，今早高開低走，半日跌逾百點，死守19000大關。
恒指高開71點，升幅一度擴大至98點，見19346，可惜只有阿里一隻重磅股，係支持唔到個市向上，加上人民幣繼續走弱，大市又再掉頭回落，倒跌195點，見19052半日低位，但守住萬九水平。半日跌幅略為收窄至119點，恒指中午報收19128；國指報收6557，跌72點；恒科指半日跌81點，報收4296。半日成交額528.97億元，維持偏低成交額。
藍籌股個別發展，但重磅科網股只有派完一張靚仔成績表嘅阿里逆市升2.4%，其他騰訊(00700)；京東(09618)、百度(09888)跟美團(03690)半日下跌不足1%至超過2%不等，網易(09999)半日更跌逾3%。大笨象(00005)都到兩吓頭搥，半日升0.1%，但友邦(01299)則微跌。港交所(00388)死守20日線308元，半日跌0.2%。日前因為業績欠佳嘅創科(00669)急跌17%後反彈，半日逆市彈3.7%，藍籌之中表現最好。中移動(00941)中期純利增8.4%，半日升2.1%，其餘兩中資電訊股同樣逆市上升。李寧(02331)恢復派發中期股息，早段股價曾升逾7%，可惜高開低走，半日升幅收窄至1.6%。
碧桂園(02007)開始籌備債務重組，有望啟動相關程序，可惜未能止跌，半日再跌8.7%，藍籌之中表現最差。花樣年(01777)達成復牌指引，復牌後指定動作跌一半，半日唔見55%，其他內房股全面向下，跌幅至少超過2%。
內地券商股威咗兩日，今日又轉勢回落，中金公司(03908)被股東海爾金盈減持A股，中金H股半日瀉5.2%；中信証券(06030)插5.5%；華泰(06886)瀉5.3%；光大證券(06178)挫4%；國泰君安(02611)降3.9%；海通證券(06837)跌3%。阿Man並非事後孔明，基本上任何一個板塊見升去追貨，中伏機會係百分百，港股已無資金肯坐定定，連北水亦彈出彈入，受唔住誘惑見升追貨，大半下場係做韭菜被割。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。