港股萬五爭持尚未見底
上周五美股三大指數顯著上升，可惜未能為港股充喜，恒指上周累跌1348點，跌幅達8.3%，港股已連續三個星期下跌，累計跌咗2877點，跌幅達16.2%，跌到咁嘅款，港股都係唔多識彈，今日仍要低開。加上內地今早公布中國10月製造業PMI降至49.2，差過預期，恒指今早再創13年半新低，不過喺A股跌幅收窄下，港股反彈，可惜仍未能收復萬五關。
恒指低開32點，其後跌幅擴大至265點，見14597半日低位，再創超過13年半新低，其後沽壓略為收歛，加上A股跌幅大大收窄，恒指曾倒升163點，見15026半日高位，其後喺15000水平爭持。恒指中午報收131點，報14995；國指亦創14年新低，見4919半日低後，中午倒升24點，報5053，五千大關失而復得。恒指科半日升97點，報2920，科技股今日跑贏大市。
藍籌股個別發展，今日科技股跑出，ATMJ全線做好，騰訊(00700)半日升4.5%；美團(03690)升4.9%；阿里巴巴(09988)半日升3.2%；京東(09618)半日升1.6%，四大巨頭之中表現較弱。其他科網股普遍反彈，本地地產股表現較弱，內銀跟內險股亦彈唔起。內房股表現特別弱，龍湖(00960)上周已被指未能如期支付債券利息，家陣連創辦人吳亞軍都跳船辭任主席，股價一度急跌逾四成，半日跌幅收窄至23.9%，但已變咗個位股。多間內房公司差不多到到付息兌付日，市場擔心陸續有內房股違約未能繳付利息，債價大跌下，多隻內房股創52周新低。內房股普遍下跌超過2%，更有個別股份跌逾一成。汽車股反彈，多得比亞迪(01211)交出一份理想季績，今早雖然隨大市低開曾創52周低位，但其後大市回升，比亞迪亦回升7.2%，更成為半日最佳表現藍籌股。
港股跌到咁款，嚟到萬五點都唔見顯著反彈，其實市底有幾弱，大家心照，港股嘅死穴就係缺水，講真以前都仲有國家隊出手，但家陣A股都畀外資沽到死死下，國家隊要救市都入市買A股，仲邊有咁多閒錢買港股，北水即使有流入，但都係有心無力。港股一浪低於一浪嘅形態未變，暫時都係唔好手多撈底，愈撈愈見底，千祈咪估底。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。