港股萬六水平仍未見資金撈底 續向下尋支持
美國11月份就業數據好過預期，同時最新消費者通脹預期急降，市場愈發相信美國經濟可以軟着陸，但減低對減息嘅憧憬。上周五美股反覆造好。美股已連升六個星期，聯儲局將於本港時間周四凌晨公布議息結果，市場預期將維持利率不變。不過喺市場對減息預期降溫，以及就近日美股強勁表現嘅情況下，鮑爺隨時又放鷹，股市將會面對下行壓力。市場普遍預期，聯儲局本次會議將唔會有乜嘢動作，重點係聯儲局會後發表嘅聲明及主席鮑爺有乜嘢講，相關訊息將作為市場衡量未來息口路徑嘅重要參考。
雖然美股續升，但周五晚反映中概股表現嘅金龍中國指數持續向下，加上周末內地公布11月消費物價指數下跌0.5%，為2020年以來最大降幅，內地或開始進入通縮年代。呢兩個因素都成為港股今日再向下借口，恒指低開185點，跌幅一度收窄至132，見16202半日高位後再度向下，更曾跌穿萬六大關，半日最多跌362點，見15972半日低位。中午恒指報收16000，跌333點；國指半日跌143點，報收5455；恒科指半日跌95點，報收3609。半日成交額只有485.33億元，嚟到萬六邊都仲未見有資金入場撈貨，趁太吸納，即係現水平對資金嚟講都未算低。
重磅科技股再次潰不成軍，京東(09618)創辦人劉強東承認管理不善，股價半日跌7%，再一次失去紅底股身份。美團(03690)半日跌4.4%創超過三年新低；百度(09888)跟阿里(09988)半日齊齊跌逾3%；小米(01810)跟騰訊(00700)半日分別跌2.7%2.7%及2%；騰訊跌穿300大關。攜程(09961)跟網易(09999)半日則跌1.9%及1%。單係呢堆重磅科技股已合共拖低恒指149點，超過大市逾四成跌幅。
除咗科技股之外，金融股普遍向下，亦齊齊拖低大市，內銀股跌幅由1.8%至3.5%；中國人壽(02628)半日跌3.7%；平保(02318)半日跌2.6%。港交所(00388)半日跌2.8%未止瀉，240元水平岌岌可危。友邦(01299)跌一日又打回原形，半日跌1.5%；大笨象(00005)半日則逆市升0.2%，喺本輪跌浪當中算相當硬淨，今日都仲企得住60元水平，呢個價位，係由18000水平守到落16000水平。
值得一提係八十幾隻藍籌當中，今日有25隻藍籌股創52周新低，包括：阿里巴巴、港交所、李寧(02331)、招行(03968)、平保、藥明生物(02269)、安踏(02020)、吉利(00175)、華潤置地(01109)、潤啤(00291)、國壽、海爾智家(06690)、蒙牛(02319)、中海外(00688)、中銀香港(02388)、恒生銀行(00011)、長實(01113)、阿里健康(00241)、新奧能源(02688)、周大福(01929)、碧服(06098)、華潤萬象生活(01209)、信義光能(00968)、中升控股(00881)及康師傅(00322)。其中李寧半日更跌逾一成，半日跌幅達13.6%；集團以22億元向恒地(00012) 收購港匯東全幢作香港總部，雖然收購價已低於市價一成，但市場普遍睇淡本港地產市場後市，依家買平咗一成，未來都仲有機會要捱價。尤其喺短期經濟環境仍極為不明朗下，高息仲要維持一段時間，預留現金先係上策，股價被質地反映市場唔認同買總部呢個舉動。
港股跌到萬六呢啲水平，仍未見有較多資金入場，成交持續低迷，以陰乾格局繼續向下尋底，短期可能要盡殺牛證重貨區，落埋去15700水平，到埋波浪理論之中嘅C浪底部15700水平，港股先會搵到較大支持。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。