無幾耐惠譽先調低咗美國信貸評級，啱啱再警告可能下調幾十間美國銀行評級，此話一出，難免打擊市場氣氛，隔晚美股三大指數齊齊跌逾1%，道指跌361點；標指跟納指分別跌51點及157點。喺對沖基金完成冚倉後，美股已失去再推升動力，喺估值又唔係平嘅情況下，稍有利淡消息，即向下尋找支持。暫時標指已到警戒線，4400-4450支持若失，美股或出現更大幅度調整。
美國7月零售銷售環比增長0.7%，較預估的0.4%更強勁，再有美聯儲委員出嚟放鷹，支持進一步加息，10年債息升至4.22%，市場擔心經濟強勁令美聯儲更大機會喺11月加息0.25%。美息高居不下，減息憧憬減退下，美匯指數回升至103.2，令人民幣急跌至7.32-7.33水平，中港兩地股市繼續捱沽。
恒指低開224點，A股一度拗腰回升，帶動港股跌幅收窄至140點，見18440半日高位，無奈已跌穿7月24日大市開始反彈至20300水平嘅起步點18562，港股大勢已去，沽壓再度增加，半日最多跌276點，見18304半日低位，暫時叫守住7月低位18279。恒指半日報收18323，跌257點；國指跌86點，報收6279；恒科指則跌53點，報收4125。半日成交額497.54億元。
藍籌股普遍下跌，金融股全面向下，友邦(01299)跌穿70元，半日跌1.5%；大笨象(00005)更跌2.2%，失守60元；內銀跟內險股未止跌，平保(02318)跟國壽(02628)半日跌逾2%，內銀股普遍跌超過1%。至於科網股同樣走軟，呢期最令人失望都算係阿里(09988)，交出一份咁靚仔嘅業績，股價紅底只係曇花一現，今日半日仲要跌穿90大關，仲衰過業績公布前。至於騰訊(00700)今日收市後公布業績，半日跌1.1%，跟其他科網股齊齊腳軟。
港交所(00388)中午公布業績前走軟，半日跌1.2%，失守300大關。不過中午公布業績符合預期，中期派息增加30%至4.5元，不過撇除投資收益，實際收入係下跌，主要係交易，結算同埋上市費都按年有所回落。呢份業績能否帶動其股價重上300元，交返畀市場決定，但成交持續低迷，就已成事實。而內地股市為咗刺激成交，已考慮減印花稅，但據聞港府呢邊無動於衷，港交所唯有再度橋刺激成交，話要研究將目前手數變股數，減低入場費，希望可以吸引年輕投資者入場。其實港股無資金入場，主要係朝令夕改嘅內地政策，嚇怕外資，人哋無法計算風險，索性離場唔玩。至於年輕投資者較接受新創投資工具或其他市場，你港股交易成本高，仲要呢兩年維持係有波幅，冇升幅嘅格局，年輕投資者轉場玩美股，甚至炒加密貨幣，都唔想再炒港股好正常。以為減低入場費可以吸引投資者，倒不如先減返交易成本，直接減印花稅更實際。
人民幣持續走弱，而內地70個大中城市房價指數按月轉跌，為今年以來首次，但市場更加憧憬快有救市措施，內房物管股反彈。阿Man都唔想提呢個板塊反彈嘅幅度，難聽啲講句，個病人重病唔急救，陷入昏迷先嚟落重藥，真係救得返條命，個病人都變植物人啦，咁同個死人會有好大分別咩，真係唔識喇…….當然阿Man都希望阿爺可以搞返掂個內房產業，否則拖死埋內銀股甚至整個銀行體系，咁就真係乜都無運行。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。