美國零售銷售及PPI均高於預期，核心CPI按年升幅則放慢至近兩年最低，對利率較敏感嘅美國2年期債息應聲跌穿5%，10年期債券則先升後回，市場憧憬息口見頂，美股炒上。隔晚晚道指收市升331點，標指及納指分別升37點及112點。美股仍然係高位整固，標指再升至4500水平，下周聯儲局議息若唔發放太過鷹嘅訊息，美股仍有機會再向上突破。另外人行噚晚宣布今日起降準0.25%，釋放更多資金，銀行喺放貸上可更進取。阿爺積極救市，隔晚夜期跟ADR均見上升，今早黑期亦升至18200水平，港股高開，並一口氣衝破10日線(18286)及20日線(18183)。
恒指高開106點，一度倒跌17點，見18031半日低位，不過內地公布三頭馬車數據，8月份工業增加值及零售表現好過預期，雖然固定資產投資數據略遜預期，亦無礙內地跟港股再升。恒指半日最多升419點，見18367半日高位，其後升勢回順。恒指半日報收18347，升299點；國指半日報收6369，升94點，恒科指半日收4120，升60點。半日成交530.34億元，以半日升幅嚟講，咁嘅成交額完全配合唔到個升勢。
弱咗幾日嘅友邦(01299)終於識彈返2.4%，但要上返70水平，先有望扭轉弱勢，暫時仲有一段距離。至於大笨象(00005)就強咗幾日，今日卒之成功突破60元，半日升2.3$。平保(02318)半日升2.8%，港交所(00388)半日升唔夠1%，睇佢保唔保得住300大關。雖然今日係升市，但唔係全部藍籌股有得升，申洲(02313)半日跌1.5%，逆市下跌兼成包尾藍籌股。重磅科網股普遍上升，阿里(09988)跟京東(09618)半日升1.5%，美團(03690)跟攜程(09961)半日分別升2.3%及1.8%。騰訊(00700)無乜力，半日僅升0.2%，325阻力唔細，暫無力突破。小米(01810)則連升四日，半日再升1.1%。醫藥股日升日跌，今日就升，咁樣單跳基本上唔好諗住短炒，日升日跌完全無路捉。
雖然中國人民銀行降低存款準備金率，但市場仍擔心內房銷售會影響其他經濟環節，雖然「認房不認貸」措施首星期帶來成效不俗，但唔代表可以扭轉樓市疲弱嘅情況，內房股未有耐可以迎來拐點，債務問題仍然係一個計時炸彈。至於美元強勢持續，人民幣雖有反彈，但短期難擺脫弱勢，拖累中港股市反彈力度。再睇埋成交額，好難令人相信港股已轉勢，恒指喺18400-500水平阻力甚大，能夠突破企穩先再講。暫時十日及廿日線修復，但企穩如否仍有待觀眾再確認。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。