港股首周開局理想 淡友空談股災望穿秋水
拜登正式確認當選下任總統，今個月20號就會入主白宮，民主黨則全控參眾兩院，有利日後施政，美股三大指數齊破頂，帶動港股今早回勇。恒指高開81點，開市無耐倒跌10點，見27538點半日低，之後回勇發力，並升至半日高位收市。恒指中午收報27899點，升350點或1.3%，創去年2月17日以來新高；國企指數報10980點，升183點；恒科指半日升250點，報收8651點。
藍籌股又係幾隻中資電訊股跑輸，話咗唔好留戀弱股，亦咪手多博反彈，估頂摸底從來困難，何必向難度挑戰，去估弱勢股個底喺邊?? 阿Man早兩日已叫咗仲有呢幾隻股嘅苦主好趁反彈跳車，一直唔肯止蝕死等，不知何年何日見家鄉。雖然侵侵有意將騰訊(00700)跟阿里(09988)都納入禁制股，但今手兩股齊反彈，分別回升1.4%及1.8%，美團(03690)半日亦升1.9%，不過JTAM呢期都係表現一般，相對其他當炒概念股，呢四大平台經濟股表現較為失色。雖然外資行好唔畀面，幾間行畀嘅小米(01810)目標價都係低過三十皮，但小米強就係強，鬼子佬唔buy IoT概念，北水捧場，任憑你班外資點調低目標價，小米就係企硬30元樓上。
講開IoT概念股，呢期阿Man得意之作就係海爾智家(06690)，掛牌首日己有報告目標價睇40+，完全又係IoT概念得到關注，加上內需股係近日資金追捧對象，咁嘅情況下，海爾智家梗係炒到甩轆。除咗IoT之外，新能源概念同樣火熱，光伏股今日全線高開，之前阿Man推介信義孖寶，信義光能(00968)無啦啦裂口高開近15%，咁嘅情況下自然會有食糊盤湧現，開市即低走，半日升幅縮水至不足1%，另一寶信義能源(03868)同高開低走，半日倒跌2%。不過光伏股未有耐散水，暫時只係板塊內資金換馬，今日見敏實(00425)做得唔錯，穩步上揚向大行目標48元推進。
百度有意喺上半年回流港股上市，同時擬夥拍吉利(00175)搞電動車，吉利半日急升17.4%，升勢有餘未盡。之前阿Man講過吉利28至29元較大阻力，只要升破最後呢個蟹貨區，可以炒到甩轆，升到飄皮，結果呢日升上28元一企穩，今日即嚟料。大摩大幅調高其目標價至50元，即係現價計仲有三成上升空間，吉利有冇咁勁，無水晶球答你唔到，反正阿Man 叫收集此股係20至23水平，有跟進嘅家下已立於不敗之地，可放水坐住等放紙鳶。
呢個星期港股有個唔錯嘅開局，恒指成功衝破27500點後，下一個較大阻力區喺28500點，唔知開口埋口叫緊股災嗰班淡友有乜嘢感受。暫時港股仍然以炒股唔炒市為主調，只要跟住資金走一定無錯，暫時新能源跟內需繼續當炒，今個星期加多個物管板塊，呢幾個板塊輪流落鑊，缸邊友都肥到襪都著唔落。
麥狄文
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。