港股高位整固 資金轉炒落後板塊
美國隔晚公布11月份CPI低過預期，道指一度急升逾700點，但市場趁好消息出貨，最終三大指數維持上升，但升幅大大收窄，道指升103點；標指升23點；納指升113點。標指一度升抵4100水平，但呢個阻力唔易過，睇嚟短期標指仍然喺3900至4100之間上落，美股都係喺高位反覆震盪。雖然CPI低過預期，不過FOMC周四議息，都預咗要加息0.5%，只係咁辛苦將個通脹壓咗落嚟，FOMC又點會咁快放水，市場一廂情願，結果好快又回復清醒，美股升幅亦大大收窄。至於夜期亦一度借美股升勢，曾升抵20000大關，甚至高見20100水平，不過隨住美股升幅收窄，夜期亦幾乎打回原形，重返19700水平。
至於恒指今早高開179點，其後升幅擴大至263點，見19859半日高位，升幅再度收窄，半日恒指升134點，報收19730；國指升61點，報收6716；恒科指半日升2點，報收4225。半日成交額747.9億元，今日全日成交額應該都會少過1500億元，反映喺萬九水平之上，願意高追嘅資金減少，估計港股暫時高位震盪，短期難以有重大突破，再大幅上升空間有限。
藍籌股個別發展，ATMJ喺隔晚金龍指數做好下，今日全部上升，騰訊(00700)升2%；美團(03690)升2.1%；阿里巴巴(09988)升1.6%；呢期京東(09618)較落後，半日升0.6%。友邦(01299)半日跌2%，大笨象(00005)半日則升0.5%，其他藍籌股乏善可陳，目前都係跟大市一齊整固。至於股神巴菲特再度減持比亞迪(01211)，但比亞迪股價半日只跌1.2%，市場對比亞迪再遭股神減持已再無之前咁大反應，睇嚟比亞迪嘅股價亦可以穩定落嚟。
噚日有消息指內地將斥資萬億扶持晶片業，刺激晶片股噚日急升，但今早出現回吐，只有ASMPT(00522)仍升1.3%，其他晶片股回吐2.7%至接近8%不等。又一次證明急升高追唔會有乜好結果。而今日教育股跟紙業股亦齊齊落鑊，當中教育股升勢急勁，當中以光正教育(06068)半日升八成最誇張，成實外教育(01565)亦急升六成，其他教育股閒閒地升兩成，而噚日急升一倍嘅思考樂(01769)，半日再升18.7%。紙業股一向都係炒到水尾先落鑊，整個板塊今日見有資金追落後，升幅由超過3%至近一成不等。不過，都係嗰句，急升高追除咗值博率大減，亦隨時變做韭菜被割，望住呢啲急升股，都係食少多教訓，眼看手勿動。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。