港股高開低走 欠成交配合舉步為艱
美國聯儲局一如預期減息0.5厘，不過鮑爺派糖，向市場表示嚟緊唔會加息0.75厘，市場鬆咗一口氣，認為美國收水步伐唔會加快，美股三大指數急彈。不過道指能夠企穩34000點，標指跟納指能否突破4400及13500呢兩個阻力，係美股後市去向嘅關鍵，目前只能視為技術反彈，暫仍難言轉勢。雖然美股急彈，但美國證交會(SEC)將88隻中概股列美預定除牌名單，令有機會除牌嘅中概股增至超過120隻，加上中國服務業PMI差過預期，即使內地股市表現還好，但港股高開低走，令港股喺一度升逾400點後升幅縮水，半日喺21000水平爭持，暫時未能企穩20日線(21053)。
恒指高開293點，其後升幅增至415點，見21284半日高位，其後升幅縮水至53點，見20923半日低位，喺中午收市前恒指重上21000水平。恒指中午報收21006，升137點；國指升56點，報收7193；恒科指半日升72點，報4337。雖然今日北水回歸，但半日成交額只有596.13億元，升市嚟講，咁嘅成交額完全配合唔到升勢，所以今日高開低走都好正常。
藍籌股以百威亞太(01876)表現最勁，半日升7.1%，主要係其首季盈利按年增長近三成。大笨象(00005)表示將於8月底前回購多10億美元股份，支撐股價企穩50元水平，今日再下一城，半日再升近1%。不過內銀股偏軟，主要係中信行(00998)供股集資，令市場擔心惹起內銀股集資潮。其實中信行一向係內銀股之中資本充足率較低者，要集資加厚資本亦無可厚非。不過中信行供股就擺明車馬問市場伸手抽水，其實較早前中國銀行亦於上月發行500億元永續債補充資本，亦已經暗渡陳倉，先透過債市抽水。即使已公布業績嘅內銀股都交出一份唔錯嘅業績，偏偏喺上月內地商業銀行發債嘅規模超過2000億元，可見內銀股只係表面風光。喺阿爺放水欲刺激經濟嘅同時，內銀卻明抽暗集，密密集資，試問內地嘅銀根又可以有幾鬆？
銀根未見真正放鬆，加上人民幣及港元偏軟，股市缺乏資金流入，自然舉步難行。港股暫時都係上落市居多，阿爺每每喺股市表現特別疲弱之際，就喺政策上動手腳，或出口術以扶持股市避過急挫，但礙於成交未能配合，升勢亦難持續，唔上唔落。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。