滙控分拆助降持續性營運成本
話咗美股炒到啲meme股(迷因股)，音樂椅遊戲嘅音樂隨時終止，喺美國10期債息重返3%大關之際，美股喺上周五開始轉勢，隔晚三大指數跌勢持續，標指跟納指跌逾2%，港股今日梗係無運行，今早恒指更曾跌近200點，創三個月低位。
恒指今早低開12點，最多升44點，曾見19701半日高位，但A股有啲腳軟，大市升勢不保，最多跌193點，低見19463，但喺A股回升下，臨近午市跌幅削半。恒指半日跌96點，報19560；國指跌29點，報6666；科指微跌不足1點，報4151。半日成交額只有407.25億元，悶到瞓著。
藍籌股普遍腳軟，重磅股大部份下跌，但跌幅尚算溫和，跌幅少於1%，變動唔大。喺美債息回升下，生科股呢類未有盈利嘅公司沽壓較大，板塊內股份普遍下跌，跌幅閒閒地超過2%。繼續唔明點解唔夠電用，限電之下電力股要喪炒，尤其火電股表現繼續精壯，而煤炭股亦向上。對於難以解開嘅迷思，都無謂再考究，呢兩個板塊都係有智慧不如趁勢。
大笨象(00005)股價唔覺唔覺又返咗50元水平之下，其股價喺業績後未能更上一層樓，應該跟分拆亞洲業務嘅爭議一直未停有關。之前有諮詢公司In Toto Consulting認為分拆可為滙控股東帶來逾2000億港元嘅額外回報，數據吸引了唔少股東眼球，同埋支持分拆嘅取態。不過滙控管理層一直以分拆涉及複雜嘅監管、實際效益及甚或政治等問題，拒絕相關分拆方案。
滙控管理層認為分拆亞洲業務，公司部門功能重複及IT系統營運成本將翻倍。不過有分析指分拆亞洲業務涉及高持續性營運成本和業務相關的複雜性及執行風險是可控的。事實上，對被分拆實體嚟講，滙控未來更輕巧嘅組織，以及新嘅核心銀行系統，反而有助於控制一部分此類成本。對剩餘實體嚟講，失去盈利能力更強嘅業務後，可能更有利決策。
在今年中期業績上，管理層表示，若滙豐分拆亞洲業務,其CET1從2022年上半年的14.4%提高到15.5%-17%，增加了營運資本成本。但事實上，滙豐亞洲過去五年嘅CET1比率一直喺15.4%-17.2%之間，比率未見太大波動，CET1維持高單位數，滙豐亞洲的資本減值風險輕微，料其營運資本成本水平仍然可控。
對於滙控管理層憂慮重組後評級下調一級，推升融資成本有可能上升25-50個基點。對於評級問題，其實滙豐嘅信用評級一向可升可降，而下調原因眾多，不可一概而論‧況且，滙控是行內歷史悠久的金融機構，以往應對銀行信用評級下調亦有豐富經驗。再者，如果滙豐分拆後，能展現出更好業績，假以時日，評級就有被上調可能。
而管理層一直強調，分拆重組需時要三至五年，喺呢段期間，其他調整及投資項目將被拖後腿。雖然分拆交易嘅各種形式均有唔同階段，需要數年時間才能執行完成。不過能夠建立一個獨立而喺亞洲嘅上市實體，將更加符合亞洲投資者利益。分拆後滙豐亞洲會有更自主權，亦可以擺脫被其他業務表現較差嘅市場拖累，同時亦可以避免此前因英國監管影響中斷派息。如果可以成功分拆，有利滙豐改善經營業績、提升公司價值，並滿足到小股東持續派息嘅要求，一舉數得，實在唔明管理層點解唔好好考慮一下。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。