滙控恢復派息仍不值博作收息
美國公布CPI數據，反映通脹有緩和跡象，聯儲局唔再趕住收水，市場繼續歌舞昇平。道指跟標指齊創收市新高，只係納指有啲腳軟，主要係疫苖股喪炒後回吐，更有分析指個別股份唔單止已偏離正常估值，甚至股價去到一個荒謬水平，令大部份疫苗股至少回吐一成或以上，拖累納指走軟。
至於港股喺26500水平，大約20日線(26574)爭持，半日成交縮水至不足800億元，買賣兩閒。恒指低開36點報26623點，早段曾倒升53點，見26713點半日高位。但大市無以為繼，其後到跌119點，見26540點半日低位，至中午跌幅收窄。中午恒指報收26636，跌23點；國指跌31點，報收9516點；恒科指跌60點。報6760點。
藍籌股個別發展，大笨象(00005)下周除淨，回復派息可能吸引好息之徒入場，半日股價升0.6%，不過以大笨象年息率不足4厘計算，仲要業務又唔係咁吸引，有心收息不如揀返內銀股好過，雖然阿Man一向唔鼓勵買股收息，但硬係對收息股有情意結，比較之下內銀股更勝大笨象。上月阿Man推介過嘅創科(00669)，喺135元水平叫買入，穩定穩紮避開咗上月底嘅小股災，剛公布業績好過預期，今早裂口高開兼創新高，話咁快到咗160-165目標價射程範圍，要起筷食糊唔使客氣。同樣派完成績表，但港交所(00388)就畀多間大行降目標價，不過500樓下嘅港交所仍然值得買入。雖然今年IPO未必有去年咁旺場，但喺中美角力下，港交所仍然係雙方僵局中嘅受惠者。
國務院印發《法治政府建設實施綱要》，提出將加大食品藥品等重點領域執法力度，藥股弱過藥保，其他生物科技股也受壓。龍頭藥明生物(02269)半日跌3.3%，其他生物科技股更閒閒地跌半成以上。美國兩大Covid-19疫苗股急挫，港股呢邊嘅疫苗股又點可以避過一跌，持有科興股權的中生製藥(01117)，中午挫4.1%，為表現最差藍籌。
汽車股有資金流入，比亞迪(01211)向北歐客戶再交付電動大巴，半日升3.8%；其他汽車股大致走高，只有小鵬汽車(09868)獨自憔悴，半日跌2.7%。今日登場嘅理想汽車(02015)，半日報收118元，跟招股價平手。汽車股咁好環境，為電動車電池嘅主要原材料股贛鋒鋰業(01772)竟然下跌，正好提供一個回吐低吸機會，呢啲位上車，用返上月底低位148元做止蝕參考，一個唔該整固完成，大有機會破頂再創新高。
國際航運公司又加價，推動每標準箱突破二萬美元，再創新高，航運股再落鑊，之前講咗呢個板塊下半年會維持強勢，喺航運費及標準箱費仍然高企下，呢個板塊都係長炒長有，值得留意係，一旦航運費同箱價回軟，呢堆股份普遍槓桿較高，一轉灣急回唔係人咁品，心臟唔夠強大就睇少一瓣算數喇。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。